KUCHING: Perambu ngaga jalai baru ti nyambung Jalai Matang-Batu Kawa terus ke selingkut Emart entara pekara diberi perati ba pemansang ti deka terus dipinta ba sitak Tupong.

Tuai Sekretari Politik Premier Sarawak ti mega Kaban Kunsil Nengeri (ADUN) Tupong Dato Fazzrudin Abdul Rahman madah, projek ngaga jalai baru ti diperambu nya beguna endar dikena mantu mutar penanggul jalai sekut ditapi peranak dia.

“Aku udah minta lalu aku deka terus nagih peminta tu nentuka projek tu dikemendar ungkup peranak ba sitak N.6 Tupong," ku iya lebuh dirandau pemberita ba Pengerami Nerima Pengabang Aidilifitri iya diatur di Dewan Hikmah, Petra Jaya kena Hari Dua.

Ku iya, taja Jalai Matang diseruri belama enggau ditangkir besai agi, pengawa nya engka apin ulih mutar penanggul jalai sekut enti arung pejalai trafik enda mayuh digaga.

Kelimpah ari nya, Dato Fazzrudin madah, pemansang ba sitak N.6 Tupong deka terus dipejalai belama nentuka peminta rayat seruran ditangkup.

Iya madah baru, pemansang ba sitak nya dipejalai ngena tig achara iya nya nyendiaka perengkaguna ti empai bisi, matau perengkaguna ti udah bisi sereta nyeruri infrastruktur ti udah lama dikena.

Sama ngabang, Sapit Premier Sarawak Datuk Amar Prof Dr Sim Kui Hian, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Sekretari Perintah Sarawak Datuk Amar Mohamad Abu Bakar Marzuki, Sapit Menteri Utiliti enggau Telekomunikasyen Sarawak Datuk Ibrahim Baki, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali sereta bala tuai opis bukai. -EDISI UKAS

Pemberita: Ahmad Daniel Faiz
Gambar: Ibanez Jeffery & George Embie