KAPIT: Bagi Menua Kapit disungkak nyadi kandang menua bisi pengulih besai nengah bemacham projek pemansang beungkus lebih RM1 bilion dipejalai, lalu nya mandangka perintah seruran ransing negap kandang menua ulu.
Menteri Kereja Raya, Dato Sri Alexander Nanta Linggi madah, penuduk belanja Perintah Sarawak ti entap ngasuh pengawa pemansang ulih dipejalai enggau jampat ari numbuh Upper Rajang Development Agency (URDA) nyadi pengawa strategik ngemansangka kandang menua nya.
“Lebih RM1 bilion udah diberi ke pemansang Kapit mungkur projek ngaga jalai ba tanah seberai Batang Rajang, ngaga jematan berega RM300 juta, jalai ke Nanga Seranau beungkus RM400 juta, jematan Sungai Kapit RM100 juta sereta ngaga Indu Opis Polis Pelilih (IPD) baru beungkus RM132 juta.
“Kelimpah ari nya, Kolej Profesional MARA digaga mega dikena negap pelajar enggau pemansang modal mensia ba sitak tu, kelimpah ngadu perengkaguna Starlink ti nambah peneras arus internet menua pesisir,” ku iya.
Iya nyebut pekara nya ba mua mayuh rambau Program Tuai Begulai Enggau Rayat diatur JKKK Rumah Jaceline Lia, Emperan Pedalai Mansau, Mumu, Ibau, Kapit, kena Hari Satu.
Dato Sri Alexander mega meransang rayat terus begempung enggau sedia napi sebarang utai tau nyadi nyengkaum pengawa bepilih nengeri, nentuka pemansang ulih ditampung lalu pengidup rayat deka maju enggau lantang agi dudi hari.
Ba program nya mega, Sapit Menteri ba Opis Premier Sarawak (Undang-Undang enggau Adat Bumiputera) Datuk Jefferson Jamit Unyat bisi nyua geran Projek Mit Pemansang Menua Pesisir (MRP) sepenyampau RM10,000 ngagai JKKK Rumah Jaceline Lia sereta RM5,000 ngagai Gerempung Indu rumah panjai nya.
Kelimpah ari nya, Sekretari Politik Menteri Kereja Raya, Datuk Alvin Runggah Jimbun mega bisi meri siti unit kereban Starlink dikena nambah sistem arus penyambung sereta 10 kutak ai beresi sepintu ba rumah panjai nya laban nadai bekal ai paip.-EDISI UKAS
