SIBU: Pengudah 20 tahun idup kekitang, siku nembiak indu, Lau Wei Wei diatu bulih tingki Malaysia bisi ‘K’, lalu nya ngubah status pengidup iya nyadi rayat Sarawak.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang Ming Tee madah, pemujur nya asil ari pengawa Palan Servis Palawan ti mantu mutar penanggul dokumentasyen ditapi Wei Wei kenyau ari ada.
“Sehari tu, ari bantu palan servis kami betuai ke Kapitan So Teck Kee, iya mujur bulih status peranak menua, tingki ti bisi ‘K’ nyadi rayat Sarawak,” ku iya madah ngagai pemberita di palan servis ditu, Hari Dua.
Berebak enggau nya, iya madah ke Kapitan So Teck Kee enggau Penghulu Ting Tien Huat kini benung ngaduka peminta tingki enggi indai Wei Wei.
Iya mega madah, penanggul orang nadai status peranak menua agi tubah di Sarawak lalu begunaka perati semua raban.
“Ari penerang Opis Pengerejista Bansa, sebarang anak Sarawak sekali ke indai tauka apai rayat Sarawak, lalu ada ba sebarang menua dalam Malaysia, agi ulih direjista ngena ‘K’,” terang iya.
“Perintah Sarawak nyediaka mayuh inisiatif ngagai sida ti ngembuan tingki ‘K’, nyengkaum pelajar sekondari, pelajar tinggi enggau bantu baka SKAS,” ku iya.
Berindik ari nya, iya ngansak apai indai Sarawak nentuka bala anak sida direjista ngambi bisi hak nitih pematut.-EDISI UKAS
