Yang di-Pertua Negeri Sarawak & Bini Ngerichah Pengerami Ramah Tamah Aidilfitri 2026 Di Indu Mengeri
KUALA LUMPUR: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini Toh Puan Datuk Patinggi Fauziah Mohd Sanusi ngerichah Pengerami Ramah Tamah Aidilfitri 2026 diatur ba siti hotel tebilang ditu, Hari Dua.
Pengerami berengkah pukul 7.30 malam nya mega digulu Tuai Akim Menua Datuk Seri Utama Wan Ahmad Farid Wan Salleh enggau Menteri Komunikasyen Datuk Ahmad Fahmi Mohamed Fadzil.
Sama ngerichah pengerami nya bala tokoh korporat menua baka Tan Sri Bustari Yusuf, Tan Sri Datuk Wira Azman Mokhtar enggau Dato Mohamed Nizam Tun Abdul Razak.
Kelimpah ari nya, pengerami nya mega richah enggau penatai bala pengari kaban belayan Tun Pehin Sri Dr Wan Junaidi ari Serakup Rabithah Alawiyah Malaysia enggau Gerempung Ahlulbait Benyahya Malaysia sereta pengari mayuh agensi baka Opis Kaul Sarawak Kuala Lumpur, Dewan Bahasa enggau Pustaka enggau UNIRAZAK.
Sekretari Kanan Yang di-Pertua Negeri Sarawak Dato Sri Syed Hamzah Syed Paie ba jaku ngelalu meri terima kasih ke penatai Tun Pehin Sri Dr Wan Junaidi enggau Toh Puan Datuk Patinggi Fauziah ulih limpang datai taja mayuh pengawa.
Iya mega ngelaluka penatai lebih 450 temuai dikangau ari mayuh tirai juru enggau nengeri nyengkaum Perak, Terengganu enggau Pulau Pinang.
Berebak enggau nya, Yang di-Pertua Negeri Sarawak sereta bini nyua pemeri duit raya kelai ngenang pengiruh bala ti datai kelebih agi nembiak mit.-EDISI UKAS
