LAWAS: Inisiatif negap pengelantang komuniti terus diberi perati nentuka pengelantang komuniti seruran dijaga, kelebih agi mantu raban begunaka bantu.
Sapit Premier Sarawak Datuk Amar Awang Tengah Ali Hasan madah, pangku pengawa Gerempung Ngintu Pengelantang Islam Malaysia (PERKIM) setipak enggau pengawa mantu komuniti nengah bemacham inisiatif ngintu pengelantang mungkur pekara rama, pelajar enggau pengerai.
Ku iya, PERKIM Lawas seruran ransing ngatur bemacham program sekumbang bulan Ramadan, nyengkaum nyua pemeri Hari Raya ngagai lebih 1,300 penerima.
“Pemujur tu ngayanka taja Lawas pelilih mit, tang ulih ngiga belanja enggau mantu raban begunaka bantu chukup ngemegahka ati,” ku iya lebuh bejaku ba Pengerami Ramah Tamah Aidilfitri PERKIM Lawas, kena Hari Dua.
Iya ti mega Kaban Kunsil Nengeri (ADUN) Bukit Sari madah, kerejasama rat PERKIM, agensi perintah enggau gempung ukai dikuasa perintah (NGO) patut majak ditegap nentuka program ngintu pengelantang ulih dipejalai meruan.
Ngenang pekara sama, iya madah ke projek niri begunan PERKIM Lawas ti benung dipejalai disadang tembu enda lama da lalu nyadi palan ngattur bemacham aktiviti komuniti ila.
Seraya Chairperson PERKIM Lawas, Dato Dayang Morliah Datuk Awang Daud madah, tuju pengerami nya ngenang pemanah inisiatif raban PERKIM ngintu pengelantang diatur sepanjai bulan Ramadan sereta sepanjai taun.
Ku iya, PERKIM Lawas deka majak regas ngatur mayuh agi program ti ukai semina ngerichah bulan Ramadan aja, tang mantu raban begunaka bantu nyendiaka diri ngintu Hari Raya.-EDISI UKAS
