Pengerami Nerima Pengabang Aidilfitri Kampung Hilir Sebauh Negut Penyerakup Komuniti
SEBAUH: Pengerami Nerima Pengabang Aidilfitri Kampung Hilir Sebauh nyadi nalan ngempung penyerakup enggau narak semangat segulai sejalai ba komuniti menua.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah ke pengelantang diasai diatu patut seruran dijaga ngambi ulih disulur rebak dudi.
Ku iya, pemansang ba genturung pendiau patut ditambah belama ari sukung tegut peranak ti temegah ke identiti enggau pendiau menua sida.
“Kerejasama rat entara peranak ba genturung pendiau enggau Tuai Raban Bansa enggau Penghulu beguna endar, ukai semina nyaga pemanah nama genturung pendiau aja, tang nentuka komunikasyen nemban ba utai enda disadang nyadi baka penusah,” ku iya ba mua mayuh rambau pengerami nya ba Balairaya Kampung Hilir Sebauh kena Hari Dua.
Iya madah, penusah bah nuntung Pelilih Sebauh bulan Januari nyin tadi ngajar kitai pemesai guna besikap enggau kerejasama semua mutar penusah komuniti.
Iya mega madah, ngintu genturung pendiau ukai semina bepanggai ba bala Tuai Raban Bansa tauka Tuai Komuniti aja, tang semua meseti regas gawa nentuka pengelantang meruan.
Dulu ari nya, iya mega ngatur pejalai ngabang Hari Raya ke Kampung Labang enggau Kampung Padan ungkup ngundang rayat sereta mereti ke peminta peranak dia.
Pengerami nya mega digulu Residen Bagi Menua Bintulu, Datu Nyurak Keti, Pegawai Pelilih Sebauh, Thadeus Ling Bartholomew Allu, Tuai Rumah Dato’ Raymond Plen sereta Injinia Bagi Menua Bintulu (JKR), Ir. Lau Sie Hung.-EDISI UKAS
