Inisiatif Nyidi Orang Empai Nerima Bantu Pengelantang Chakah Dipejalai
KUCHING: Inisiatif nyidi orang ti empai nerima bantu pengelantang patut terus chakah dipejalai ba renggat komuniti nentuka nadai sapa tinggal ari nerima bantu nitih pematut.
Menteri Pemansang Indu, Ruang Bilik enggau Komuniti, Dato' Sri Nancy Shukri madah, agi bisi sekeda orang ti patut nerima lalu empai dipasuk ba rintai dalam sistem bantu Opis Pengintu Pengelantang Mensia Mayuh (JKM).
Ku iya, penanggul nya begunaka pengeregas tuai raban bansa, tuai lokal enggau gempung ukai dikuasa perintah (NGO) mantu ngelala raban diselinting.
“Aku ngena peluang tu minta tuai komuniti di genturung pendiau sama berati utai ti nyadi ngelingi kita laban agi bisi peranak ti empai nerima bantu ke alai sida tu idup seranta.
“Nya alai, sida patut mantu madah ngagai opis JKM ti semak. JKM tu bisi ba tetiap pelilih. Tu chara kitai mantu, semina kitai nadai ba tetiap rumah, ari nya kitai enda nemu nama utai nyadi kebendar.
“Ari nya, pangku pengawa bala tuai genturung pendiau, sekali ke tuai parti, NGO tauka tuai komuniti, meri penerang ngagai JKM ngambi bantu ulih diberi. Sida deka datai ngaga pansik, udah nya deka ngaduka peminta nya,” terang iya.
Iya nyebut pekara nya lebuh dirandau pengudah Ziarah Kasih di Kampung Tabuan Lot, ditu, kena Hari Empat, ti ngaul pengawa meri bantu ngagai tiga penerima nyengkaum siku ti empai kala nerima sebarang bantu.
Ba pejalai nya, tetiap penerima nerima pemeri mata duit RM500 ari Opis Parlimen Santubong, kelimpah RM300 ari Yayasan Pengintu Pengelantang Menua (YKN), dua unit kerusi roda sereta bantu pemakai serimbai Aidilfitri.
Dato Sri Nancy ti mega Kaban Parlimen Santubong madah, inisiatif nyidi orang enda ulih bepanggai ba agensi perintah aja, tang begunaka penyiru komuniti ngambi sama meri penerang jampat sereta betul.
Iya mega madah, naka Januari 2026, bisi 556,521 kes bantu udah diberi ba selampur menua ngaul belanja sepenyampau RM252 juta.
Ari penyampau nya, ku iya, 165,944 penerima orang tuai, seraya 251,132 da orang timpang pendiau (OKU).-EDISI UKAS
