BANGKOK: Pengeransing Sarawak negap agenda pemeruan enggau idar kuasa dikunsi ba panggau antarabansa lebuh ngambi bagi ba Minggu Pemeruan Asia (Sustainability Week Asia) 2026 diatur di Bangkok, Thailand.

Sapit Menteri Kuasa enggau Pemeruan Rampa Menua Sarawak, Datuk Dr Hazland Abang Hipni ngari ke Malaysia ba konvensyen nya ari ngulu dua sesyen besai ti berandauka pekara bekaul pemeruan, idar kuasa enggau ngintu biodiversiti.

Ba sesyen keterubah diatur 24 Mac, iya ngulu Dinner Roundtable Dialogue ngena sulu jaku ‘Nature and the Bottom Line: Risk, Resilience & Growth’, ti berandauka chara mutar ngena rampa menua asal enggau ngintu biodiversiti.

Seraya 26 Mac, Datuk Dr Hazland ngulu sesyen Ministerial Interview enggau batang randau ‘Resources to Resilience: Sarawak Leadership in Energy Transition and Environmental Sustainability’.

Iya bekunsi chara Sarawak mungkur pekara matau, teknikal, pekara wang enggau pengereja pengawa ti ngena manah pengeraja asal chara meruan enggau kerejasama ti deka bakih kunsi teknikal enggau meranak puku, kelebih agi napi penanggul kuasa global ti ngubah ngagai idar kuasa enggau enda kelalu bepanggai ba minyak enggau gas.

Minggu Pemeruan Asia 2026 Bangkok siti ari konvensyen besai ba rantau Asia Pasifik ti meri perati ngagai pemeruan, polisi klimet enggau ekonomi gadung.

Konvensyen nya ngempuruka urung 1,000 pemesai perintah, ngaga polisi enggau pemekuh industri ungkup berandauka chara ngerumban idar ngagai industri beresi enggau ekonomi mimit karbon.-EDISI UKAS