KUCHING: Sarawak terus negap penuduk nyadi entara pemekuh industri maritim serantau ari ngulu Asia Pacific Maritime (APM) 2026 diatur di Singapura, ti ngerandang peluang besai ngagai pemeranak puku enggau kerejasama antarabansa.

Pavilion Sarawak ti dikemudi begulai enggau Serakup Industri Maritim Sarawak (SAMIN) enggau Opis Dagang enggau Dagang Temuai Sarawak di Singapura (STATOS) mandangka penau nengeri ba pengawa ngaga kapal, injiniring marin sereta servis menua luar tebing tasik ba pelasar mandang maritim tebilang Asia nya.

Presiden SAMIN, Ling Tiu Khing madah, industri pngaga kapal di Sarawak diatu nyengala nambah ari sukut penau, diumba pengawa bekenaka teknologi baru, nambah pengelandik teknikal sereta fasiliti dok kapal.

Ku iya, pemekuh industri lokal ransing nangkup standard antarabansa seriris enggau peminta nambah pengawa ngaga kapal baru ba makit global.

“APM nyendiaka pelasar besai ungkup Sarawak mandangka pengering industri, nanggam kaul enggau pemekuh global sereta nambah kaul industri maritim nengeri,” ku iya nengah siti penerang media, kena Hari Empat.

Dulu ari nya, pengawa bejadi pavilion nya dipenyadika Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Michael Tiang Ming Tee begulai enggau Sekretari Mendam Opis Menteri Dagang Antarabansa, Industri enggau Pemeranak Puku Sarawak (MINTRED) Datu Lester Matthew, ngayanla pengeran perintah nengeri negap penuduk Sarawak ba renggat antarabansa.

Diatur pengelama tiga hari berengkah ari 25 ngagai 27 Mac di Marina Bay Sands Expo and Convention Centre, program besai nya ngempuruka lebih 20,000 pemekuh industri, 750 raban pemandang global sereta lebih 150 pakar, lalu nya nyadi pelasar strategik ngagai Sarawak ngerembaika rentayan kerejasama enggau matak pemeranak puku baru.

Pavilion Sarawak mega marit sekeda kompeni lokal ngambi bagi mandangka penau ngaga langkar enggau ngaga kapal, servis sukung luar tebing tasik sereta pemutar marin.

Sida ngambi bagi nya mega seriris enggau inisiatif perintah nengeri meransang ekonomi tumbuh enggau nyendiaka mayuh agi pengawa puang, kelebih agi ba sektor teknikal enggau industri.

Seriris enggau utai ti nyadi kemaya hari, Sarawak mega meri perati ngagai pekara pemeruan nengah pengawa bekenaka teknologi gadung, inovasyen enggau nambah penyikar operasyen ba industri maritim.

Berebak enggau nya, SAMIN terus bejalaika pangku pengawa nyadi penyungkak pemansang industri maritim nengeri ari negapka kerejasama entara pemekuh industri sereta ngelaku Sarawak ba renggat antarabansa. -EDISI UKAS