SIMANGGANG: Komiti Pemansang enggau Pengelikun Genturung Pendiau (JKKK) Batu Minggu ti nyadi jematan entara rayat enggau perintah, Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis udah bekunsi inisiatif pemadu baru dipejalai perintah nengeri tu.

Pengawa nya dipejalai ba siti penemuai basa ari komiti nya ngagai iya ngaul 13 kaban JKKK Batu Minggu betuai ke chairman sida, Taim Kubong.

Ba randau nya, iya madah ke pemesai guna atur gawa JKKK ti sistematik, nyengkaum rikod minit aum digaga meruan ngambi dianjung ngagai Opis Pelilih tauka Opis Residen ungkup peminta rasmi baka elaun baum, agih belanja pemansang genturung pendiau sereta peminta bantu pengelantang enggau projek pemansang mit perintah.

Kaban Kunsil Nengeri (ADUN) Simanggang nya mega meri penerang pasal bemacham inisiatif perintah nengeri ti tau dikena peranak, baka bantu jali rumah panjai nyentuk RM50,000, bepanggai ba lot tanah ti diaku sereta dipesetuju komuniti.

Kelimpah ari nya, iya nerang ke perintah naka ulih nyendiaka pelajar pechuma ngagai anak Sarawak ti nampung pelajar ngagai tikas degree ba universiti lokal di nengeri tu.

Ngenang pekara ngintu pengelantang, iya madah ke pemaik Kenyalang Gold Card, nyengkaum tulung rabat sepenyampau RM1,800 sereta diskaun berubat ba klinik luar, dikena nambah pengelantang orang tuai.

“Perintah Sarawak nyediaka bemacham bantu, tang tu bepanggai ba pengeregas JKKK nentuka penerang datai ba maya ti patut sereta akses bantu ulih diterima serap komuniti.

“Aku pechaya kitai ulih nempa komuniti ti maju agi, begempung enggau lantang lalu nentuka pemansang ti asi enggau inklusif,” ku iya.

Berindik ari nya, iya ngarap ke JKKK Batu Minggu terus bejalaika pangku pengawa nyadi jematan komunikasyen entara rayat enggau perintah, kelimpah regas gawa ke pengelantang komuniti menua. -EDISI UKAS