KUCHING: Opis Rampa Menua (JAS) Nengeri Sarawak ngelalau mensia mayuh ba selampur nengeri tu enda nunu sengapa enti nadai pemendar ari raban bekuasa.

JAS ba siti penerang media kemari madah, jaku tangkan nya patut diperati, kelebih agi maya musin kemarau enggau hari angat ti benung nyadi di Malaysia diatu ti tau ngasuh penanggul sebun balat agi sereta penusah angus enda ulih ditagang.

Terang JAS, tagang nunu nya mega ulih nagang pengamah angin ketegal sebun kelebih agi maya musin kemarau.

“Pengawa nunu sengapa tau ngasuh angin kamah lalu ngachau pengerai mensia mayuh, kelebih agi sida ti bisi sakit ampus, batuk enggau bronkitis ketegal nyirut ke debu alus (PM2.5)," ku JAS.

JAS madah baru, raban ti balat ngasai empas angin kamah nya nyengkaum anak mit, orang tuai enggau orang ti bisi penyakit raya.

Kun iya, jaku tagang nya mungkur pengawa nunu reba umai, babas, uras domestik, ramu rumah enggau nunu ba taba muai uras sereta tanah kerapa nadai surat pemendar ari raban bekuasa.

Nunu sengapa menua tau ngachau Takat Pengamah Angin (IPU), kualiti tanah enggau ai kusut, kelimpah munas ke flora, fauna sereta ekosistem kampung enggau tanah kerapa.

JAS nyemetak madah, orang ti ditemu salah ngereja pengawa nya deka ditinggang ukum nengah Seksyen 29A, Akta Kualiti Alam Sekeliling 1974 (Pindaan 2024), nyengkaum ukum entara RM25,000 ngagai RM1 juta, tauka jil enda ngelui lima taun, tauka tinggang kededua ukum nya.

Kelimpah ari nya, pesalah mega tau ditinggang ukum tambah nyentuk RM5,000 ba tetiap hari penyalah nya dikereja pengudah notis diberi sereta kompaun maksimum manggai 50 peratus ari penyampau ukum maksimum.

Berindik ari nya, mensia mayuh ditangkan enda nunu sengapa ti nadai pemendar sereta terus berati ke sebarang aktiviti ti tau ngachau rampa menua ari meri penerang ngagai raban bekuasa. -EDISI UKAS