SIMANGGANG: Peranak ba sitak Kunsil Nengeri (DUN) Simanggang dipinta nyaga enggau ngintu manah perengkaguna ti disedia nengah Program Transformasyen Menua Pesisir (RTP) nentuka pemaik ulih diasai lama.

Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis madah, ulah bisi tanggungpengawa nyaga pemeresi enggau pengelikun projek RTP beguna endar ngambi tetiap perengkaguna ti digaga tetap ulih dikena enggau meri empas timpuh panjai ngagai komuniti.

Kebuah pia ku iya, RTP udah meri ubah ngagai pengidup peranak menua pesisir ari nyendiaka bemacham perengkaguna pemun baka balai mayuhguna, balai besai, gelanggang lumba enggau main, jematan semin enggau jalai kebun.

“RTP ukai semina projek fizikal aja, tang siti tanggungpengawa ti patut dijaga begulai. Enti perengkaguna tu dijaga, baru pemansang ti digaga endang meri reti ngagai pengidup rayat,” ku iya.

Iya ti mega Kaban Kunsil Nengeri (ADUN) Simanggang nyemetak madah ke perengkaguna RTP mega mandangka Perintah Sarawak naka ulih nentuka pengelantang rayat seruran dijaga.

Ngenang pekara bekaul, Datuk Francis Harden mega ngatur pejalai ngabas pengawa ngaga rumah panjai baru Rumah Sri Empaga, San Demam Asal ti digaga ngena Skim Jali Rumah Panjai ari Kaunsil Pemansang Pengawa Berumah (HDC).

Projek berengkah taun 2023 nya ngena ungkus RM30,000 dikena ngaga 11 pintu bilik ti diatu udah 40 peratus tembu.

Kelimpah ari nya, iya mega ngabas projek nyeruri Balai Besai Rumah Encharang, Klassen Sekula beungkus RM100,000 enggau Kaunsil Pelilih Sri Aman (MDSA) nyadi agensi bejalaika projek.

Pejalai nya mandangka penyiru perintah nentuka tetiap projek pemansang dipejalai nitih perambu enggau meri pemaik ngagai rayat menua. -EDISI UKAS