Tuai Zon Opis Bomba enggau Penyah Penusah Malaysia (JBPM) Sibu, Andy Alie madah, operasyen ngerara api dipejalai ngena chara strategik ari magi tiga sektor besai iya nya A, B enggau C, ngaul 50 iku raban ari Balai Bomba enggau Penyah Penusah (BBP) Sibu Sentral.
Ku iya, pemar geografi mega begunaka penyikar raban lebuh sida ngelayang anak sungai sebedau ulih ngerara api ari majak nyerarai.
“Sektor dibagi enggau raban bebagi tubuh gawa tembu diatur pukul 9 pagi, lalu operasyen diatu dipejalai ba serap endur babas angus,” ku iya.
Operasyen nya mega disukung bemacham agensi nyengkaum RELA, Raban Penyaga Orang Periman Malaysia (APM), Polis Diraja Malaysia (PDRM), Opis Parit enggau Entali Ai (JPS) sereta raban voluntia, mandangka kerejasama semua agensi ti tegap maya mutar penusah.
Berebak enggau nya, JPS Sibu nganjung piko ngaga jalai baru, ngambi raban nyamai ngelawa ngagai endur api nyerarai ti mar dilawa.
Andy madah, raban sida nerima kangau keterubah kena 23 Mac tu tadi, tang operasyen enda ulih dipejalai tumu ketegal endur nya urung dua kilometer penyauh ari jalai tama pemadu semak sereta nadai akses ti ulih ditengah.
