RAJANG: Sepenyampau RM7 juta diagih nengah Agensi Pemansang Delta Rajang (RADDA) dikena nyeruri jalai kebun ba Rajang, Belawai enggau Jerijih dikena negap sektor betanam betupi sereta nyaga pengelantang peranak menua pesisir.

Kaban Parlimen Tanjong Manis, Dato Ir Yusuf Abd Wahab madah, pejalai projek nya disadang meri pemaik besai ngagai bala pekebun enggau nyendia akses jalai ti menyana enggau likun agi ngagai kebun sida.

Ku iya, infrastruktur ti menyana agi deka nentuka asil kebun dibai lengkas agi enggau mayuh agi ngambi dijual, seraya nambah produktiviti enggau penatai pemisi rayat.

“Lebuh pemansut asil kebun nambah, tu mega nambah penatai pemisi peranak mega deka nambah lalu tu meri empas positif ngagai ekonomi menua,” ku iya ba Pengerami Tuai Begulai Enggau Rayat serimbai Hari Raya Aidilfitri di Balai Komuniti Rajang, Hari Enam.

Nambah ke nya, iya mega ngelalau rayat bekelimat ngena belanja berindik ari ekonomi global enda menuku berindik ari penyarut ti nyadi ba Timur Tengah, ti udah ngujungka rega minyak niki sereta meri empas ngagai rega barang.

Ku iya, pekara tu deka meri empas ngagai belanja rayat kelimpah nambah komitmen belanja perintah mutar pemar diatu.

Pengerami ti diatur nya dikena meri peluang ngagai mensia mayuh ngintu Aidilfitri begulai enggau tuai.

Kelimpah ngerapit kaul entara tuai enggau rayat, program nya mega nyadi pelasar narak semangat beserakup, kaul sereta pengawa minta ampun entara komuniti.

Bela datai iya nya tuai raban bansa enggau tuai komuniti sereta peranak Kampung Rajang. - EDISI UKAS