PAKAN: Kerejasama rat entara komuniti enggau pengari rayat deka terus diberi perati nentuka pemansang menua pesisir inklusif agi sereta besemekih.
Kaban Kunsil Nengeri (ADUN) Pakan, Tan Sri William Mawan Ikom madah, inisiatif pemansang ti ngena pemansut menua ulih ngerandang peluang ekonomi baru ngagai komuniti menua.
Ku iya, pemujur rumah temuai ba Rumah Sibar, Lubuk Lemba, Ulu Sarikei nunjukka pengulih dagang temuai bepelasarka komuniti dikena nambah penatai pemisi peranak.
“Inisiatif tu nunjukka sektor dagang temuai ulih nyadi pemansut ekonomi meruan nyema diatur manah sereta dikemujur komuniti,” ku iya.
Iya madah munyi nya ba Pengerami Bejadi Program Transfomasyen Menua Pesisir (RTP) di Rumah Kanyan, Nyalak Ladong, Hari Enam.
Berebak enggau nya, iya ngagihka belanja RM100,000 dikena bejalaika projek ngaga jalai nuju jelatung ti nyadi penyungkak ekonomi baru tumbuh, kelebih agi ba sektor dagang temuai komuniti.
Nambah ke nya, iya madah, pengawa nyeruri balai Gerempung Indu ukai semina meri pemaik ngagai peranak menua, tang mega ngemerat sukut pengelantang enggau pengelikun nyengkaum pengawa nyendia paip bomba enggau ke bukai.
Iya mega meransang peranak ngena tanah dikemisi sida ungkup aktiviti betanam betupi baka nanam sawit enggau getah dikena nambah penatai pemisi.
“Penyerakup entara komuniti sereta kerejasama enggau pengari rayat nya kunchi nyungkak pemansang ekonomi menua pesisir,” terang iya. - EDISI UKAS
