SIMANGGANG: Kaunsil Pelilih Sri Aman (MDSA) terus ngemujur agenda pemeruan rampa menua lebuh ngatur Program Mantar Bejadi Earth Hour 2026, seraya bukti penyikap Sri Aman nyadi tuai rumah renggat Raban Bekuasa Lokal (PBT) Sarawak taun tu.
Program ti diatur di Mini Stadium Sri Aman, Librari MDSA enggau Taman Tebing Ai Batang Lupar nya mujur ngempuru mayuh raban nyengkaum staf enggau Kaban Kaunsil MDSA sereta Sarawak Skills Sri Aman dikena meri pengeleda ngagai komuniti senentang pemesai guna nyaga rampa menua.
Aktiviti belabuh diatur pukul 7.30 pagi enggau senamrobik di Mini Stadium Sri Aman sebedau ditampung enggau simbolik nanam paung kayu ti dipenyadi Chairman MDSA, Kaunselor Anthony Abell Chendan begulai enggau Sekretari MDSA, Mohd Rizal Zakaria enggau Sapit Chairman MDSA, Kr Balean Suji Inggol.
Bisi mega diatur aktiviti beripai ngelingi stadium enggau Taman Tebing Ai Batang Lupar enggau kerejasama Balai Bomba enggau Penyah Penusah (BBP) Sri Aman, lalu mandangka komitmen begulai agensi nya nyaga pemeresi.
Tambah mega, program nya meri pemaik ngagai komuniti lebuh MDSA nyendia kaunter Program Vaksinasyen, ngelekat mikrochip sereta meri lisin ukui ba pelaman Librari MDSA.
Berebak enggau nya, inisiatif meli minyak lama ti diatur ba Taman Tebing Ai Batang Lupar nerima timbal chukup manah lebuh 197 kilogram minyak mujur digumpul ba timpuh 10 minit keterubah, mandangka tikas pengeleda komuniti ngagai pengawa ngena baru barang lama.
Program mantar bejadi nya tembu pukul 10.30 pagi lalu Mohd Rizal ngelalau mensia mayuh terus nyukung Earth Hour ti deka diatur malam tu.
Program kepenudi ti diatur pukul 8.30 malam tu di Mini Stadium Sri Aman, deka dipenyadi Sapit Premier Sarawak, Datuk Amar Profesor Dr Sim Kui Hian nengah simbolik madam lampu pengelama sejam begulai enggau agensi perintah.
Sekumbang timpuh nya, program richah enggau pengawa mandangka video bekaul rampa menua enggau ubah klimet kelimpah dipanchar terus ba media rama ti disadang dipasuk entara 200 nyentuk 250 individu nyerangkung 28 PBT ba selampur Sarawak.
Kelimpah ari nya, semua peranak Sri Aman diperansang begulai madam lampu enggau nutup kereban elekterik ti enda diguna pukul 8.30 malam tu kelai komitmen nyaga pemeruan rampa menua ungkup rebak dudi. - EDISI UKAS
