KAPIT: Kerejasama rat entara agensi perintah enggau komuniti menua nyaga pemeresi sereta pengelikun sungai terus ditegap nengah ngatur Program Pengeleda, Pengelikun enggau Pemeresi Sungai diatur Kaunsil Sungai Sarawak (LSSS) Bagi Menua Kapit di Rumah Arik, Antawau Ili, Sungai Bena, Hari Enam.

Kaban Kunsil Nengeri (ADUN) Pelagus, Wilson Nyabong Ijang madah, inisiatif baka nya ukai semina nambah tikas pengeleda mensia mayuh, tang mega mekuh kerejasama entara agensi perintah enggau komuniti menua nyaga pemeruan sungai.

Ku iya, kerejasama rat komuniti ba program baka tu beguna endar nentuka sungai semampai beresi, likun enggau dijaga ungkup rebak dudi.

Nambah ke nya, iya mega meri terima kasih ngagai raban pengatur sereta komuniti ti bebendar ngemujur program nya.

Iya nyemetak madah, perintah keran nampung agenda pemansang ba ulu, kelimpah meri perati ngagai peminta rayat nyengkaum peminta nukar atap ba Rumah Arik sereta nyukat tanah ngena Seksyen 6 Kanun Tanah Negeri ti diatu nganti agih belanja.

Program pengelama dua hari, belabuh ari 27 nyentuk 28 Mac nya diisi enggau mayuh aktiviti nyengkaum beripai meresi sungai enggau licha meri pengeleda dikenatai agensi bekaul.

Ba pengawa nya, iya mega nyua 15 jaket pengelikun pemeri LSSS ungkup peranak dikena nyamin sukut pengelikun ba sungai.

Sama datai, Pegawai Pelilih Kapit Thomas Geoffrey Kendawang, pengari LSSS Leo Nanang, Injinia Opis Parit enggau Entali Ai (DID) Kapit Inja Hellegers Achong, pengari Residen Bagi Menua Kapit Daniel Batin Irbo, Dr. Nelson Berandah Seli ari Unit Pemansang Pengeraja Asal (URDA) Kapit sereta pengari Tuai Polis Pelilih Kapit Insp. Muhamad Bazil Jaini. - EDISI UKAS