MIRI: Semangat kerejasama enggau bela besaup entara komuniti meseti terus ditegap maya betapika pemar ekonomi kemaya hari, kelebih agi rega barang enggau minyak niki ti meri empas ngagai pengidup besehari-sehari rayat.
Sapit Premier Sarawak, Datuk Amar Awang Tengah Ali Hasan madah, pekara ti nyadi nya ukai semina meri empas ngagai ekonomi ruang bilik, tang mega tau ngasuh mensia mayuh irau ati.
Ku iya, ba pemar nya, rayat meseti terus ngemeran pengawa besaup sereta negap penyerakup nyadi tiang napi pemar global.
“Kitai berasai lantang ati laban Sarawak dikemudi Premier, YAB Datuk Patinggi Tan Sri (Dr) Abang Abdul Rahman Zohari Tun Abang Openg lalu menua kitai entap, likun enggau lantang,” ku iya.
Iya madah munyi nya ba Pengerami Aidilfitri diatur Gerempung Anak Lawas Di Miri (PAJLDM) di siti hotel tebilang, ditu Hari Enam.
Ngenang silik, iya meri jamin perintah naka ulih nentuka pengelantang rayat terus dijaga nengah bejalaika mayuh inisiatif nyengkaum Bantu Barang Diguna Pemun Sarawak (SKAS) dikena ngelempung tating belanja idup.
Ku iya, penyerakup enggau kerejasama ti tegap nya peneguh Sarawak nentuka pemansang meruan sereta pengelantang rayat semampai dijamin.
Nambah ke nya, iya nyemetak madah ke pemesai guna PAJLDM nyadi pelasar ti ukai semina ngedut kaul, tang mega nyaup nyaga pengelantang kaban kelebih agi anak Lawas ti ngentapka diri ba Miri.
“Gerempung tu nyadi pelasar nyaup sida ti datai kitu ungkup tuju pelajar, berubat enggau pengawa bukai.
“Nengah gerempung tu, kitai ulih meri bantu ngagai sida ti begunaka bantu sereta nentuka pengelantang kaban semampai dijaga,” ku iya.
Berebak enggau nya, iya meransang gerempung nya terus bekerejasama enggau agensi perintah ngatur mayuh program pemansang komuniti nyerangkung bidang pelajar, pengerai enggau dagang.
Dulu ari nya, Chairman PAJLDM, Dr Narawi Abu Bakar madah ke gerempung nya ransing ngatur mayuh aktiviti nyaga pengelantang nyengkaum ibuh ke pesakit ti dianjung ke Sepital Miri.
Bisi mega diatur pengawa nyua perais penyulut ngagai peranak Lawas di Miri kelai ngaku pemujur sida.
Sama datai, bini Datuk Amar Awang Tengah, Dato Dayang Morliah Awang Daud, Sapit Menteri Pemansang Indu enggau Nembiak Mit Sarawak, Datuk Rosey Yunus sereta Sapit Datuk Bandar Miri, Ariffin Mohamad. - EDISI UKAS
