Bekal Ai Sarawak Agi Dipatau, Lori Tangki Besikap Napi Musin Kemarau
KUCHING: Perintah Sarawak nengah Opis Menteri Utiliti enggau Telekomunikasyen Sarawak (MUT) nyendia lori tangki ai ngambi besikap ba selampur nengeri napi musin kemarau.
Menteri MUT, Dato Sri Julaihi Narawi madah, lori tangki ti dikena nya nyengkaum ari aset enggi Opis Bekal Ai Menua Pesisir (JBALB), Sarawak Water, kelimpah lori tangki tambah ti disuwa nentuka peminta bekal ai ulih ditangkup nyema penanggul bekal ai tejanggal nyadi.
“Nya kebuah, kitai bisi lori tangki ai ti semampai sedia tetangkupka peminta bekal ai lalu nyema musin kemarau nyadi, kitai meseti nganjung bekal ai ngagai endur ti napi penanggul nya.
“Naka diatu agi ulih dipatau ke alai bekal ai agi chukup,” ku iya lebuh dirandau pemberita ba Pengerami Nerima Pengabang Aidilfitri iya, ditu Hari Minggu.
Ngenang sekali ke bisi ripot tumu bekaul penanggul bekal ai tejanggal, Dato Sri Julaihi madah, naka diatu apin bisi sebarang ripot diterima nyengkaum maya ngintu Aidilfitri ke alai bekal ai ba selampur Sarawak agi ba tikas manah.
Taja pia, opis menteri iya deka terus matau pekara ti nyadi nentuka sebarang peminta bekal ai ulih diputar lengkas nyema ubah gaya hari ngeruga peranak.
Nambah ke nya, Dato Sri Julaihi madah, 93 peratus ari manggai 360 projek bekal ai beungkus manggai RM7 bilion ba selampur Sarawak udah tembu tauka benung dipejalai.
Ku iya, projek nya nyerangkung ngaga enggau nyeruri fasiliti nyaga pemeresi ai, bejalaika sistem grid bekal ai sereta nukar enggau nyeruri batang paip ba selampur Sarawak.
Ku iya, ari penyampau nya, manggai RM5.9 bilion diagih ungkup projek bekaul tangki ai enggau sistem grid, seraya RM1.1 bilion da ungkup pengawa nukar sereta nyeruri batang paip sepanjai 2,740 kilometer.
“Tu mai reti semina urung 6 nyentuk 7 peratus aja ti agi ba renggat deka diadu tauka pra - kontrak,” ku iya.
Naka diatu, iya madah ke bungkur penuh bekal ai udah dijapai ba mengeri, lalu bungkur ba menua pesisir ba tikas 71 peratus enggau pukulrata bungkur bekal ai ba Sarawak diatu urung 85 nyentuk 86 peratus.
Bela datai, dua Sapit Premier Sarawak Datuk Amar Douglas Uggah Embas enggau Datuk Amar Prof Dr Sim Kui Hian, Speaker Kunsil Nengeri Tan Sri Datuk Amar Mohamad Asfia Awang Nassar, dua Sapit Menteri Utiliti enggau Telekomunikasyen Sarawak, Datuk Ibrahim Baki enggau Datuk Liwan Lagang, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi sereta temuai dipebasa bukai. -EDISI UKAS
