LAWAS: Inisiatif negap sistem bejalai ke servis perintah di utara Sarawak majak chakah nengah pejalai matau projek Palan Opis Begulai (IAC) Lawas ti dikeandal meri perengkaguna genap ngagai rayat.

Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala ti mega Kaban Kunsil Nengeri (ADUN) Mulu madah, projek IAC Lawas nya inisiatif strategik Perintah Sarawak nyendiaka siti palan opis begulai ti deka endur mayuh opis enggau agensi perintah gawa ba siti perabung.

“Nengah projek tu, rayat enda ibuh ngelawa endur bukai, tang bisi akses servis perintah ti muntang, jampat enggau sistematik,” terang iya lebuh ngatur pejalai matau ngagai taba perambu projek nya, Hari Tiga.

Tuju pejalai nya ngabas status projek kelimpah nentuka semua perambu pemansang digaga nitih spesifikasi sereta standard udah ditetap.

Iya mega madah ke projek palan nya ukai semina meri perengkaguna ngagai mensia mayuh aja, tang nambah penyikar pengawa sektor perintah ari meri servis ti moden enggau kondusif agi.

Ku iya, projek nya dikeandal meri empas besai ngagai pemansang sosioekonomi menua nya, sereta ulih nyadi penyungkak mengeri tumbuh meruan di Lawas.

“Pejalai matau baka tu beguna endar nentuka tetiap projek digaga silik, nitih tuju enggau ngelantangka rayat,” ku iya.

Iya mega nyemetak madah, Perintah Sarawak seruran nambah pemansang infrastruktur enggau perengkaguna mensia mayuh ba selampur nengeri nyengkaum menua utara, nentuka pemansang ti sebela, inklusif enggau meruan.

Sama datai, Kaban Parlimen Lawas, Dato Henry Sum Agong, Direktor Kandang Menua Agensi Pemansang Kandang Menua Utara (NRDA), Datu Ubaidillah Abdul Latip sereta Direktor Unit Pengereja Nengeri (SIMU), Sapiah Daud.-EDISI UKAS