KUCHING: Taja kiruh ngesan pangku pengawa nyadi Sapit Menteri Besai, Datuk Amar Fadillah Yusof tetap ngelimpang awak diri ngabas bakih media ti diatu benung diperubat ba Hospital Besai Sarawak (HUS), kena Hari Minggu.
Penyiru iya nyata dipeda lebuh ngabas siku tukang gambar Gerempung Berita Nasional Malaysia (Bernama) Sarawak, Razali Nordin, 54, ti diatu napi mayuh komplikasyen pengerai kenyau ari Ramadan tu tadi.
Nengah sebengkah penerang ba Facebook iya, Datuk Amar Fadillah madah ke Razali deka beputung injap tungkul atau ba Palan Tungkul Atau Sarawak kena 4 Mei tu.
Berindik ari nya, iya mega ngingatka bakih media semampai nyaga pengerai taja kiruh ngereja mayuh pengawa.
“Kereja sigi beguna tang pengerai beguna agi. Jaga diri enggau manah,” ku pesan iya.
Nya alai, iya besampika semua pengawa Razali berubat mujur sereta jampat gerai.
Bela datai, bini iya, Datin Amar Ruziah Mohd Tahir. - EDISI UKAS
