LIMBANG: Sekretari Perintah Sarawak Datuk Amar Mohamad Abu Bakar Marzuki udah datai ngabas pengawa nyikap Program Sarawakku Sayang di Kompleks Sukan Limbang.

Tuju penatai iya dikena nentuka program nya mujur ke deka diatur berengkah 10 ngagai 12 April tu.

Program nya ditusun enggau macham pengawa baka program pemandang agensi perintah, kaunter servis, Limbang Kitchen, bejual, konsert rayat, Malam Mantaika Main Asal sereta lumba.

Program dipadah deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena 11 April tu.

Nangkan ngabas palan nya, Datuk Amar Mohamad Abu Bakar betuaika aum pengatur program alai iya minta semua komiti bejalaika pengawa enggau manah ngambika program nya ila diatur enggau mujur.

Kelimpah ari nya, iya bisi limpang ngabas beberapa iti projek nyengkaum Projek Rumah Rangau Valley enggau Projek Pusat Pentadbiran Bersepadu (IAC) Limbang.

Bela nyempulang iya maya nya Sapit Sekretari Perintah Sarawak (Adminstresyen) Datu Felicia Tan Ya Hua, Direktor Unit Matau Pengatur Sarawak (SIMU) Sapiah Daud, Direktor Unit Protokol, Adat enggau Pengatur Program Sarawak Datu Hamdan Sharbini, Direktor Unit Komunikasi Awam Sarawak (UKAS) Awang Putrayusrie Awang Redzuan enggau Residen Sitak Limbang Unus Tambi. -EDISI UKAS