KUCHING: Orang dagang enggau pemeranak puku Bumiputera Sarawak diperansang nengkebang konsortium strategik dikena ngambi peluang ba Program Solar Betikas Besai Renggat Keenam (LSS6) ke deka digaga di Semenanjung Malaysia.

Sapit Menteri Besai Datuk Amar Fadillah Yusof madah, LSS6 disadang digaga baru di Semenangjung Malaysia enggau penyampau meranak puku minimum urung RM350 juta, ti begunaka chara kerejasama ke lebih agi berurun ba pemain industri menua tu.

"Nyema peluang nya deka digaga di Sarawak, nyangka enda mayuh kitai ulih ngambi bagi ba program nya kediri.

"Nya alai, kitai meseti bisi pelin ti nyemetak ngambika bela ulih ngambi bagi ba peluang nya.

"Tu tau digaga kitai nengah chara nengkebang konsortium ti ngempung macham raban ari Bumiputera," pia ku iya.

Iya bejaku munyi nya maya Program Jihad Bisnes 2026 ditu, Hari Satu.

Iya mega madah, konsortium nya ditengkebang individu enggau kompeni ti ngembuan macham penemu sereta pengelandik ke ulih ngenegapka agi penuduk kompeni Bumiputera ngambi peluang ba projek besai baka LSS6.

Datuk Amar Fadillah bekunsika pekara nya ngambika pemain industri Sarawak tau berengkah ngelanggur lalu ngiga bakih strategik berengkah ari diatu taja projek nya deka digaga di Semenanjung Malaysia.

"Aku dulu agi madah ngagai semua taja projek nya digaga di Semenanjung tang anak Sarawak ke bisi ati agi tau ngambi bagi.

"Ke beguna diatu iya nya kitai ngepunka singkang nengah ngembuan chara berunding strategik lalu ngiga bakih ke tau enggau kitai," ku iya madah baru. -EDISI UKAS