SSWFFB Meranak Puku USD850 Juta Aset Global, RM1.6 Bilion Bon Domestik
KUCHING: Sarawak Sovereign Wealth Future Fund Board (SSWFFB) udah meranakka puku urung USD850 juta ba aset asil tetap global enggau RM1.6 bilion ba bon domestik, taun 2025.
Chairman SSWFFB Tan Sri Datuk Seri Panglima Sulong Matjeraie madah, tu mandangka turu nya udah ngalih ngagai renggat ngatur ti bela ngelai pemansang signifikan ba pengawa meranakka puku.
"Tu ngelai prinsip kami iya nya nyaga puku kelimpah numbuh macham portfolio enggau chara berenggat," ku iya.
Iya bejaku munyi nya ba Pengerami Hari Raya SSWFFB ke dirichah enggau penatai Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ba Kunsil Nengeri (DUN) Sarawak, Hari Tiga.
Iya mega madah, SSWFFB bela diterima nyadi Associate Member of the International Forum of Sovereign Wealth Funds ti mai turu nya dipasuk ba rentayan global pemeranak puku.
Nerang enggau nyemetak ku iya, taun tu deka nyadi renggat baru ba pengawa SSWFFB meranakka puku ti mungkur pengawa nambah portfolio enggau chara berenggat nyengkaum ekuiti global ba kuing tuju meranak puku timpuh panjai.
Ku iya, pengawa nya deka diatur enggau chara berurun dikena nentu ulih mulaika asil timpuh panjai.
Bela datai maya nya Sapit Premier Sarawak, Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker DUN Sarawak, Tan Sri Datuk Amar Mohamad Asfia Awang Nassar, Menteri ba Opis Premier Sarawak, Dato Sri John Sikie Tayai sereta temuai dipebasa ke bukai.-EDISI UKAS
