Program Sarawakku Sayang 2026, Nyempil Kaul Rayat & Perintah
KUCHING: Program Sarawakku Sayang (SKS) 2026 dipunka ba Sitak Limbang berengkah 10 ngagai 12 April tu disempulang macham servis perintah, bantu enggau peluang ekonomi ke diungkup ngagai rayat mayuh.
Program ke deka diatur selampur Sarawak nyentuk November nya ngelai perintah nengeri ransing nentu servis perintah dikenatai enggau inklusif agi enda ngira dini endur.
Sapit Menteri Industri Pemakai, Komoditi enggau Pemansang Kandang Menua ke mega Kaban Kunsil Nengeri (ADUN) Bukit Kota, Datuk Dr Abdul Rahman Ismail madah, program nya nyadi pelasar dikena mai rayat semak agi enggau macham agensi perintah.
"Aku siku pengari rayat endang besetuju amat program tu diatur lalu kitai beterima kasih ngagai Perintah Sarawak laban udah milih Limbang nyadi palan keterubah ngatur program.
"Program tu dikemujurka mayuh agensi perintah ngambika rayat muntang agi ngadu pengawa bekaul sida," ku iya madah.
Iya bejaku munyi nya maya program Juh Randau ke diatur Unit Komunikasi Awam Sarawak (UKAS) di Studio UKAS ditu, Hari Tiga.
Iya mega madah, sekeda ari batang program maya nya nyengkaum akses ngagai macham servis perintah kelimpah ke bukai baka beperesa pengerai pechuma, program nerang bantu baka Bantu Barang Diguna Sarawak (SKAS) enggau peluang ekonomi baka Limbang Kitchen.
Nangkan nya, Residen Limbang, Unus Tambi madah, iya melabaka program nya deka nerima sambut ke manah ari mensia mayuh ti bela digagaka macham program nyempulang baka pekit ke nyendia mayuh perais manah.
Ku iya, mensia mayuh mega deka beperindang enggau artis menua tu kena 10 enggau 11 April.
Pengerami bejadi program dilanggur diatur 11 April pukul 10.30 pagi ba Kompleks Lumba Limbang ke disadang dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg. -EDISI UKAS
