TATAU: Mensia mayuh ditangkan ngambika enda sepeneka betunuka babas maya musim kemarau tu ti tau bendar ngujungka penusah angus nyadi.
Menteri ba Opis Premier Sarawak, Dato Sri John Sikie Tayai madah, penusah kampung angus di Kuala Tatau empai lama patut nyadika lalau ngagai bala mayuh.
"Ngambika bela nemu, urung 300 hektar pemesai kampung angus di Kuala Tatau alai bomba madamka api ba pengelama 11 hari.
"Ditu kitai meda penusah angus tau bendar nyadi maya musim kemarau," ku iya madah.
Iya bejaku munyi nya ba Program e-Invois enggau Kaunter Luar Bantu Khas Perintah ke diatur Opis Asil Dalam Nengeri (LHDN) Sarawak enggau Pengawa Bejadika Pemeri Barang Diguna Sarawak (SKAS) renggat Pelilih Tatau, Hari Dua.
Kelimpah ari nya, iya minta mensia mayuh ngambika enda sepeneka bebuaika papung insap laban nanggika penusah angus tau nyadi.
Berebak enggau nya, Dato Sri John Sikie bela meri jaku lalau nyaga pengerai diri maya musim kemarau tu.
Sama bisi datai maya nya Pegawai Pelilih Tatau, Calvin Ligong Bujang @ Endawie enggau Tuai Penulung Direktor HASiL Sarawak, Ugak Nyun.-EDISI UKAS
