SEBUYAU: Siti da loji meresi ai baru ngena teknologi sistem akut (Acute Water Supply System) ngembuan kapasiti lima juta liter sehari (MLD) deka digaga di Sg Ular, Sebuyau dikena nyamin bekal ai ba menua nya.

Menteri Utiliti enggau Telekomunikasyen Sarawak, Dato Sri Julaihi Narawi madah, projek nya udah dikemendar lalu diatu benung milih kontraktor.

Ku iya, loji baru nya deka nyadi sistem sukung ngagai perengkaguna ti bisi, lalu nangkup peminta ai ti majak nambah.

“Loji di Sebuyau semina bisi kapasiti 3.2 MLD seraya di Simunjan 5 MLD, tang kededua nya apin chukup kelebih agi maya musin kemarau,” terang iya.

Iya nerang pekara nya ngagai pemberita ba program “Berziarah di Desa” serimbai Pengerami Ramah Tamah Nerima Pengabang Aidilfitri MUT 2026 ditu, Hari Empat.

Kandang diatu, ku iya, menua Sebuyau nerima bekal ai ari Loji Meresi Ai Batu Kitang, kelimpah loji ke bisi ngembuan kapasiti mit di Sebuyau enggau Simunjan.

ADUN Sebuyau nya madah ke siti loji meresi agi enggau kapasiti 5 MLD di Sebangan ti udah dikemendarka sebedau tu diatu benung digaga lalu disadang tembu Julai tu.

Iya mega ngelalau mensia mayuh mereti ke Ordinan Air Sarawak enggau Ordinan Elektrik dikena nyeliah saru penemu lalu sama besalah ke agensi pemekal enti sema bisi utai jai bap remis sida.

“Tanggungpengawa agensi pembekal baka JBALB, Sarawak Water tauka Sarawak Energy nangka meter aja. Ngelebus meter, pengaa ngintu nya ba jari pengempu tauka pengatur begunan,” ku iya nyemetak.

Sama datai, Sapit Menteri Utiliti enggau Telekomunikasyen Sarawak Datuk Liwan Lagang, Residen Bagi Menua Samarahan Mohamad Irwan Bahari Bujang enggau Tuai Pegawai Eksekutif SESCO, Yusri Safri.-EDISI UKAS