SEMOP: Genturung Palan Pemansang Menua (RGC) Semop diperambu diangkat nyadi siti Genturung Kebun ti nanam bemacham bansa pun buah enggau sayur nyadi pemansut ekonomi komuniti dia.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, nya nipak ke pengulih besai peranak menua nya ti tebal agi raban orang berikan enggau bumai, kelimpah tanah ti ami enggau sedandang.
“Utai diguna pemun nyengkaum benih utai tanam enggau bantu servis sanding penemu nengah Opis Betanam Betupi deka disedia nentuka projek nya ulih nyadi nyata,” ku iya.
Iya nyebut perambu nya ba mua mayuh rambau Pengerami Ramah Tamah Aidilfitri 2026 diatur Palan Servis Kunsil Nengeri (DUN) Semop enggau Palan Servis Parlimen Tanjung Manis di Taba RGC Semop, Hari Empat.
Datuk Abdullah ti mega ADUN Semop madah, pemansang menua nya deka terus chakah dipejalai ngambi nyadi siti genturung ti disikap meruan ngena perengkaguna infrastruktur bala Balai Komuniti Pulau Bruit, endur makai, pasar tani, surau enggau tadika.
Seraya Kaban Parlimen Tanjung Manis, Dato Ir Yusuf Abdul Wahab meri pengaga ati ngagai bala anak Pulau Bruit ti udah bulih pemutus nyulut ba peresa SPM empai lama.
Iya mega ngelalau peranak anang nunu sengapa kandang diatu ketegal hari angat, rangkai enggau ribut deras ti tau ngasuh penusah angus nyadi.
Pengerami Ramah Tamah Aidilfitri mega richah enggau bemacham isi program narit ati nyengkaum chabut tikit benasip, pekit diri sebilik ngena baju sebaka enggau pekit baju Hari Raya pemadu manah ungkup kategori lelaki enggau indu.
