ULU TERU: Inisiatif negap rentayan infrastruktur menua pesisir majak dipejalai nengah projek melakin Jalai Ulu Teru, Tinjar ti dikeandal mai empas signifikan ngagai pengelantang peranak menua.

Projek beungkus RM45.2 juta nya mandangka Perintah Sarawak seruran naka ulih nentuka pemansang ti inklusif sereta sebela entara mengeri enggau menua ulu.

Sapit Premier Sarawak, Datuk Amar Douglas Uggah Embas madah, projek nya deka meri pemaik terus ngagai 31 rumah panjai kelimpah peranak lantang ngelawa perengkaguna pemun baka sekula enggau klinik.

“Projek tu deka meri pemaik ngagai 31 rumah panjai sereta lantang ngelawa sekula enggau klinik di menua tu,” ku iya ba aum media pengudah bejadi pengawa nasih tanah projek nya di Tinjar, Hari Minggu.

Ku iya, projek 23.4 kilometer pemanjai nya ditaga tembu 24 bulan lalu disadang nyadi penyungkak mobiliti enggau aktiviti sosioekonomi peranak menua pesisir.

Iya mega ngansak raban kontraktor nentuka projek lanchar enggau nitih langgur ke udah ditetapka.

Iya nyemetak madah ke Gabungan Parti Sarawak (GPS) tetap nyadi penyungkak pemansang nengeri, kelebih agi nyendiaka infrastruktur pemun bisi kualiti dikena ngangkatka tikas idup rayat ba menua ulu.

Sama datai, Sapit Menteri Pengerai, Pengawa Berumah enggau Perintah Lokal ti mega Kaban Kunsil Nengeri (ADUN) Marudi, Datuk Dr Penguang Manggil, Sapit Menteri Infrastruktur enggau Pemansang Penyangkai Kapal Sarawak ti mega ADUN Sadong Jaya, Datuk Ir. Aidel Lariwoo, Direktor Opis Kereja Raya (JKR) Sarawak, Cassidy Morris, Sekretari Mendam Opis Menteri Infrastruktur enggau Pemansang Penyangkai Kapal, Chiew Chee Yau sereta Residen Bagi Menua Miri, Galong Luang.-EDISI UKAS