DALAT: Pengerami Nerima Pengabang Gong Xi Raya 2026 diatur di Kompleks Kebajikan Dalat, kena Hari Minggu tu tadi mandangka penegut kaul penyerakup pupu bansa di pelilih tu.

Pengerami nya mega richah enggau penatai Menteri Pemansang Indu, Nembiak Mit enggau Pengelantang Komuniti Sarawak ti mega Kaban Kunsil Nengeri (ADUN) Dalat, Dato Sri Fatimah Abdullah.

Ba pengerami nya, iya bisi limpang berandau enggau rayat dia, kelimpah madah kediri berasai gaga meda pengerami baka nya diatur enggau lantang.

Ku iya, Pengerami Nerima Pengabang Gong Xi Raya kelai pemanah penyerakup rayat pupu bansa, pengarap enggau budaya di Sarawak ti seruran dikemeran nengah semangat bebatak asur enggau bebasa ke pangan diri.

“Pengerami tu ukai semina ngintu hari besai aja, tang nyadi pelasar beguna negutka kaul sereta narak semangat penyerakup ba rayat enggau agensi ti ngaul diri,” ku iya.

Iya mega madah, kerejasama semua agensi pengatur mandangka semangat segulai sejalai taja sida sama bisi pengawa enggau tanggungpengawa diri empu.

Dulu ari nya, Dato Sri Fatimah dipebasa nyua setipikit ngenang jasa ngagai agensi enggau raban ti ngambi bagi kelai ngaku pengiruh enggau kreativiti ngerichah pengerami nya.

Sama datai, Pegawai Pelilih Dalat, Mathew Hubert, Temenggong Hendi Suhai, Pemancha Peter Lai Sakul, Penghulu Sim Tan Chuan enggau Direktor Urusan Sinong Pelita Plantation, Dato’ Tan Chew Chin. - EDISI UKAS