Taman Industri Kereban Rumah Disadang Matak Meranak Puku, Ubah Landskap Industri Lokal
KUCHING: Pemansang Taman Industri Kereban Rumah di Sarawak diperati ulih matak meranak puku baru lalu ngubah landskap industri kereban rumah lokal ti diatu agi didominasi dagang mit.
Sapit Premier Sarawak Datuk Amar Awang Tengah Ali Hasan madah, nyendiaa taba industri ti disikap meruan enggau lantang beguna endar ngambi tetangkupka peminta pemeranak puku enggau meransang sektor nya tumbuh berurun agi.
“Diatu industri kereban rumah di Sarawak enda entu ngerembai endar lalu suah agi dikereja diri sebilik aja. Nya alai, kitai enggai baka nya belama.
“Kitai bisi mayuh material, kita bisi semua pemansut lalu nya kebuah kitai deka numbuhka ‘Furniture Park’ tu ngambi kitai ulih matak pengawa meranak puku mayuh agi ba industri tu.
“Pemansut kitai ukai semina ari kampung asal aja, tang mayuh agi ari kampung tanam lalu tu mih ti deka nyukung pemansang industri kayu ramu ti belalauka produk ti berega, ari nya kitai bisi pengawa ti kondusif ungkup dikemansang,” ku iya.
Iya nyebut pekara nya lebuh dirandau pemberita pengudah Pengerami Ramah Tamah Aidilfitri PUSAKA 2026 di Wisma Sumber Alam ditu, Hari Lima.
Datuk Amar Awang Tengah ke mega Menteri Pengeraja Asal enggau Pemansang Mengeri II (MUDeNR) madah, taman industri kereban berumah ti dilanggur nya deka digaga berenggat, berengkah di Kuching sebedau dikerembai ke Tanjung Manis dikena mungkur kandang menua tengah Sarawak.
Ku iya, projek nya udah dikemendar di baruh Langgur Pemansang Malaysia Lumpar Ke-13 enggau taba pemansang mega udah disedia, lalu diatu nganti agih belanja aja dikena ngaga.
Menteri Dagang Antarabansa, Industri enggau Meranak Puku nya mega madah ke Sarawak ngembuan pengelebih ari sukut pemansut kereban mata nyengkaum kayu ari kampung tanam ti ulih nyukung industri tumbuh meruan.
Kelimpah ari nya, ku iya, pengawa bekenaka kereban alternatif baka buluh mega diperati bisi pengulih besai dikerembai dikena ngaga produk kereban rumah ti berega.
Dulu ari nya, Datuk Amar Awang Tengah udah bejadika Lobi Menara Wisma Sumber Alam ti udah tembu diseruri.
Sama datai, Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh, Sekretari Mendam MUDeNR Datu Abdullah Julaihi, Menjiar Besai PUSAKA Datu Zainal Abidin Abdullah, Direktor Opis Kampung Sarawak Datu Hamden Mohammad, sereta temuai bukai.-EDISI UKAS
Pemberita: Nur Nabilla
Gambar: George S. Embie & Douglas Demong
