Premier Sarawak ke mega Chairman Gabungan Parti Sarawak (GPS) Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengaya pemansut asal aja enda ulih nyamin pengelantang enti sema enda diatur enggau manah.
Ku iya, bisi menua ti kaya enggau pemansut baka minyak tang agi napi penyeranta ketegal lemi ba pengawa ngatur sereta bechiping magi asil.
“Pemansut ekonomi kitai tegap taja mayuh menua ti bisi pemansut ekonomi tegap tang sida agi merinsa. Peda aja menua Nigeria enggau Sudan, pemansut bisi tang rayat agi seranta laban enda diatur enggau manah,” ku iya.
Iya nyebut pekara nya ba pengawa bejadi Konvensyen GPS di Palan Konvensyen Borneo Kuching (BCCK) kena Hari Minggu.
Nerang silik, ba aum media, Datuk Patinggi Tan Sri Abang Zohari madah, pengawa ngatur pemansut ti manah patut disukung ngena penemu sereta pengelurus nentuka asil pemansang ulih diasai serap rayat.
Ku iya, chara inklusif ngatur pemansang beguna endar dikena nyeliah takah ti tau ngeruga penegap rama.
“Taja pia, pekara beguna iya nya anak kitai dudi hari. Enti mayuh graduet nadai bulih kereja, kitai patut nipakka ekonomi enggau pengelandik dikembuan sida. Enti enda, sida deka ngiga kereja ke luar,” ku iya.
Berindik ari nya, ku iya, Sarawak meri perati ngagai pemansang modal mensia nengah pelajar, nyengkaum ba bidang Sains, Teknologi, Injiniring enggau Matematik (STEM), kelimpah bidang profesional bukai.
Sama datai, Sapit Menteri Besai Datuk Amar Fadillah Yusof, Sapit Premier Sarawak Datuk Amar Douglas Uggah Embas, Sapit Premier Sarawak, ke mega Presiden Parti Sa’ati Rayat Sarawak (SUPP) Datuk Amar Profesor Dr Sim Kui Hian, Sapit Premier Sarawak Datuk Amar Awang Tengah Ali Hasan, Presiden Parti Rakyat Sarawak (PRS) Dato Sri John Sikie Tayai, Presiden Parti Demokratik Progresif (PDP) Dato Sri Tiong King Sing sereta pemesai bukai. -EDISI UKAS
