KUCHING: Penyerakup enggau semangat kerejasama parti komponen nyadi pun pengering Gabungan Parti Sarawak (GPS) nentuka politik tegap sereta pemansang nengeri dipejalai belama.
Menteri Dagang Temuai, Seni enggau Budaya ke mega Presiden Parti Demokratik Progresif (PDP), Dato Sri Tiong King Sing madah, pengering gempung nya bepanggai ba penau tetiap parti ngatur bida penemu ngena penuai runding ari chara konsensus, bebasa enggau bekunsi kuasa ti chulin.
Iya nyebut jaku nya ba mua mayuh maya Konvensyen GPS diatur di Palan Konvensyen Borneo Kuching (BCCK), kena Hari Minggu.
Ku iya, bala tuai ti engkeman ukai dipeda ari pemerani iya bejaku, tang ari pengepuh iya gawa enggau bejalaika tanggungpengawa ngagai rayat.
“Tu mega ukai ketegal penuduk, tang tanggungpengawa ti patut disan enggau ati lurus,” ku iya.
Iya madah ke GPS udah nyata ngayanka penau nyadi gempung ti tegap, tuai runding enggau bepenau asil ari pemintar tuai ngatur penemu ti bebida.
Taja pia, ku iya, tetiap raban patut ngaku agi bisi pengelemi ti patut dikemanah nentuka gempung nya terus relevan enggau dipechaya rayat.
“Kitai meseti ngaku pengurang ke bisi lalu naka ulih ngemanahka nya, ukai terus ngetan pengilap enggau pemingking,” ku iya.
Berebak enggau nya, iya madah ke rayat ngelempaika pengandal besai ngagai penau Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg nentuka barang diguna pemun rayat majak dijaga sereta penusah ulih diputar manah.
Ku iya, pengandal rayat ngagai GPS patut terus ditegap, kelebih agi maya napi pengawa bepilih deka datai.
“Rayat meseti andal ke GPS nya gempung ti tegap, begempung enggau seruran betatika pengelantang Sarawak,” ku iya.
Iya nyemetak madah, pengandal nya bepanggai ba pemanah pengawa ti udah dikereja sereta chara ngemudi gempung nya dudi hari.
Berindik ari nya, Dato Sri Tiong meransang semua raban terus negapka pun penyerakup ti udah bisi ngelama tu ari nyaga basa sereta negap semangat konsensus ba tetiap pemutus.
“Kitai nentuka tetiap komponen dalam GPS ngesan pangku pengawa enggau besai reti laban pengering kitai tu mih pengering semua,” ku iya.
Sama datai, Sapit Menteri BesaiDatuk Amar Fadillah Yusof, Sapit Premier Sarawak ke mega Presiden Parti Sa’ati Rayat Sarawak (SUPP) Datuk Amar Profesor Dr Sim Kui Hian, Sapit Premier Sarawak Datuk Amar Douglas Uggah Embas enggau Datuk Amar Awang Tengah Ali Hasan, Presiden Parti Rakyat Sarawak (PRS) Dato Sri John Sikie Tayai sereta bala bukai. -EDISI UKAS
