Sarawak Nyau Deka Bulih Status Geopark Global, Pemendar Rasmi UNESCO Dipelaba 23 April
KUCHING: Sarawak diatu sesingkang da bulih aku antarabansa lebuh Sarawak Delta Geopark dipelaba dikemendar rasmi nyadi Taba Geopark Global ari Gerempung Pelajar, Sains enggau Main Asal Gerempung Bansa Beserakup (UNESCO) kena 23 April tu.
Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh madah, sida udah nerima timbal tumu nengah jaku bekaul nerima setipikit nya pengudah dipesetuju komiti penyerenih geopark.
Ku iya, pemutus rasmi dipelaba digaga nengah aum Kaunsil Eksekutif UNESCO di Paris kena 23 April tu.
“Aum nya deka berandau enggau ngemendarka Sarawak Delta Geopark nyadi siti ari UNESCO Global Geopark sebedau setipikit ngaku disua ngagai pengari mendam Malaysia di Paris,” ku iya.
Iya nyebut pekara nya lebuh dirandau pemberita pengudah Pengerami Ramah Tamah Aidilfitri PUSAKA 2026 di Wisma Sumber Alam, ditu, Hari Lima.
Ngenang silik, Datuk Len madah, ari aku nya, Sarawak deka nyadi geopark keempat di Malaysia ti diaku UNESCO.
Iya mega andal ke status tinggi nya deka dikena manah ngelaku Kuching enggau Sarawak nyadi palan dagang temuai tikas dunya ti nyelai.
Iya nerang, pemansang geopark nya meri perati ngagai konsep pemansang meruan ti mungkur elemen geologi, biodiversiti sereta marit komuniti lokal, kelimpah ngerandang peluang ekonomi ba bidang gastronomi, pemakai enggau budaya.-EDISI UKAS
