BETONG: Masejit Pelilih Mit Debak ti baru diatu diberi nama Masjid Al-Azim.

Kelai bejadi nama masejit nya udah dipenyadika Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg lebuh bejadika masejit baru nya, kena Hari Lima.

“Aku tu enggau lurus ati bejadika Masjid Al-Azim, Debak, Betong," ku iya.

Masejit nya didiri ba tanah pemesai 2.98 ekar ti beungkus RM12 juta ngena belanja khas Sarawak (SDAF) Premier Sarawak.

Projek nya asil inisiatif enggau pengawa diaduka Sapit Menteri Pemansang Indu, Nembiak Mit enggau Pengelantang Komuniti Sarawak ti mega Kaban Kunsil Nengeri (ADUN) Saribas Datuk Mohammad Razi Sitam.

Projek nirika masejit nya udah dipejalaika Kaunsil Islam Sarawak berengkah 20 Disember 2023 lalu tembu 25 November 2025.

Masjid Al-Azim diatu nyadi palan pengarap ti lantang kelimpah nyadi penyungkak pengawa negap kaul enggau pemansang raban ummah Pelilih Mit Debak.

Dulu ari nya, Premier Sarawak enggau pemesai bukai sama Sembiang Jumaat.

Sama datai, Sapit Menteri Pemansang Indu, Nembiak Mit enggau Pengelantang Komuniti Sarawak ti mega ADUN Saribas Datuk Mohammad Razi Sitam, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Yang Dipertua Kaunsil Islam Sarawak Datuk Misnu Taha sereta bala bukai. -EDISI UKAS

Pemberita: Ahmad Daniel Faiz
Gambar: Ibanez Jeffery