PUTRAJAYA: Perintah Sarawak majak negapka kerejasama strategik enggau Perintah Besai dikena ngerumban projek pemansang kelebih agi ba menua pesisir enggau menua ulu.

Pekara nya dibantai ba siti aum strategik betuai ke Sapit Sekretari Perintah Sarawak (Perambu Ekonomi enggau Pemansang) Dato Sri Dr. Muhammad Abdullah Zaidel begulai enggau Sapit Tuai Direkyor Unit Penyeraris Projek, Opis Menteri Besai (ICU JPM) Datuk Muhamad Zamani Mohd Ali, ditu, Hari Lima.

Dato Sri Muhammad Abdullah nyemetak madah ke Perintah Sarawak seruran ransing nampung kerejasama rat enggau agensi Perintah Besai nentuka tetiap projek pemansang ulih digaga manah.

“Kerejasama rat entara perintah nengeri enggau Perintah Besai kunchi pemujur projek pemansang,” ku iya.

Tuju aum nya negapka pengawa nyeraris entara kededau raban nentuka projek pemansang lanchar, berurun enggau meri empas ngagai rayat.

Lebuh baum, bemacham pekara bekaul status pejalai projek, pemar enggau pekara patut dikemanah enggau matau pejalai projek udah dikerandau lenak.

Entara batang aum nyengkaum ngerumban meri ngemendar, nambah penyikar bejalaika projek sereta nentuka agih belanja diberi dikena manah nitih taga ti ditetap.

Seraya raban ICU JPM mega madah kediri keran nyukung pengawa Perintah Sarawak ari matau rat pengawa bejalaika projek.

Aum nya ngayanka pengeransing enggau sinergi kededua raban nentuka agenda pemansang menua digaga inklusif, meruan enggau meri pemaik ngagai semua rayat Malaysia.

Sama datai, Sekretari Mendam Opis Menteri Utiliti enggau Telekomunikasyen Sarawak, Direktor Tanah enggau Survei Sarawak, Direktor Opis Parit enggau Entali Ai Sarawak, Direktor Opis Serbis Engkelebat Sarawak, Sapit Direktor Opis Kereja Raya Sarawak, Direktor Unit Perambu Ekonomi Sarawak sereta Direktor Unit Matau enggau Bejalaika Projek Sarawak.-EDISI UKAS