BETONG: Lebih 5,000 nembiak udah rejista ba program Pelajar Tinggi Pechuma Sarawak (FTES), lalu nya ngayanka timbal chukup manah diterima ba inisiatif perintah nengeri ngelati pelajar tinggi.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah nengeri udah ngagihka RM260 juta dikena mayar bayar belajar manggai 10,000 nembiak enggau sebagi ari kuota nya udah diisi naka diatu.
“Nya alai anak kitai ti agi besekula diatu, kena manah awak ti bisi sebedau tuai seraya belanja enda nekul laban Perintah Gabungan Parti Sarawak (GPS) deka mayar bayar belajar,” ku iya.
Iya nibar ke jaku nya ba Program Tuai Begulai Enggau Rayat Kunsil Nengeri (DUN) Saribas di Palan Lumba Riveria, Debak Hari Lima.
Iya madah, nembiak ti rejista nya ari empat universiti lokal iya nya Swimburne University, Curtin University, Universiti Teknologi Sarawak (UTS) enggau i-Cats University College ba 68 program ti disedia bepuguku bidang sains kelimpah mungkur kus psikologi, pekara akaun, pekara wang, undang-undang enggau perubat.
Datuk Patinggi Abang Zohari madah, Perintah Sarawak mega meri sekularship ngagai Universiti Malaysia Sarawak (UNIMAS) ba bidang perubat laban Sarawak begunaka mayuh lutur.
“Kitai suntuk urunh 4,000 lutur ditu, nya alai kitai meseti ngisi pengawa puang nyadi lutur nya.
Sama datai, Sapit Premier Sarawak Datuk Amar Douglas Uggah Embas, Sapit Menteri Nembiak, Lumba enggau Pemansang Orang Dagang Sarawak ke mega Kaban Kunsil Nengeri (ADUN) Layar Datuk Gerald Rentap Jabu, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Sapit Menteri Pemansang Indu, Nembiak Mit enggau Pengelantang Komuniti Sarawak ke mega ADUN Saribas Datuk Mohammad Razi Sitam, Kaban Parlimen Betong Dato Dr Richard Rapu, bala tuai opis sereta bala bukai. -EDISI UKAS
Pemberita: Ahmad Daniel Faiz
Gambar: Ibanez Jeffery
