BETONG: Projek nanam inyak di Lubok Tamang Agropark deka nyungkak penatai pemisi peranak menua kelebih agi ba menua Debak.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa bekenaka teknologi nanam inyak sereta kompeni pengemudi deka ngerandang peluang ekonomi baru ngagai peranak menua.

Iya nerang, peranak menua diatu ulih nanam inyak ba tanah diri empu lalu nyual asil ngagai kompeni ti nyadi pemeli, lalu nya nyamin makit ti tegap.

“Aku dipadah enti siti ruang bilik nanam inyak tu, kompeni deka meli ari kita, abis nadai penatai pemisi nambah RM6,000 sebulan.

“Ari nya kitai udah bisi siti chara baru ngadu pengawa betanam betupi moden,” ku iya ba Program Tuai Begulai Enggau Rayat Kunsil Nengeri (DUN) Saribas di Palan Lumba Riveria, Debak kena Hari Lima.

Datuk Patinggi Abang Zohari madah, perintah udah ngelala urung 2,000 ikar tanah endur nanam inyak kelimpah merambu pemansang menua ngelingi dikena nyukung aktiviti ekonomi nya.

Iya mega madah, Jalai Lubok Tamang baru mega deka nyadi penyungkak ngagai sistem logistik ti ulih ngadu eksport inyak di agropark nya ti deka dianjung ke Bebuling STOLport di Spaoh.

Terang iya, jalai baru ti ngemandak takah pejalai ari Kampung Tuie/Kampung Manggat ke Debak lalu udah nya ke Spaoh ngasuh inyak ulih dieksport enggau jampat.

“Kitai ulih ngena kargo ke Tanjung Embang enggau ari Tanjung Embang dianjung ke China laban utai jampat jai meseti jampat,” ku iya.

Tambah mega ku iya, peminta inyak di China chukup manah laban inyak ari Bagan Datuk, Perak udah dijual ngagai menua nya nengah siti kompeni pengemudi ti nyual ke menua nya.

Nya alai ku iya, kompeni ari Perak nya mega dichiri nyadi kompeni pengemudi tis ama di Debak ti meli inyak ditanam peranak menua. -EDISI UKAS

Pembeita: Ahmad Daniel Faiz
Gambar: Ibanez Jeffery