KUCHING: Pengeransing perintah negapka pengawa bejalaika servis pemun majak ditegap lebuh isu bekal ai beresi, bah enggau sistem parit dikemerat nengah chara perambu inklusif ngaul timpuh pandak, jelan enggau panjai.
Menteri Dagang Temuai, Seni enggau Budaya ke mega Presiden Parti Demokratik Progresif (PDP), Dato' Seri Tiong King Sing madah, pengawa dikereja belama beguna endar nentuka pengelantang rayat terus dijaga, senutuk enggau pekara dikemeratka perintah mutar isu pemun ba menua.
Ku iya, chara komprehensif beguna endar nentuka tetiap isu ulih diputar manah lalu enda majak raya.
Iya nyebut jaku nya maya Konvensyen Gabungan Parti Sarawak (GPS) di Palan Konvensyen Borneo Kuching (BCCK) kena Hari Minggu.
Konvensyen nya udah dipenyadika Premier Sarawak ke mega Chairman GPS, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Iya nyemetak madah, pengawa bejalaika servis meseti ditambah ngambi tetiap perambu perintah endang meri empas ngagai rayat ba renggat baruh.
“Rayat ukai semina meda utai dikemendar aja, tang asil ti nyata diasai sida ba pengidup besehari-sehari,” ku iya.
Ngenang silik, iya madah ke bekal ai tetap dikemeratka perintah laban meri empas terus ngagai pengidup rayat, lalu nya begunaka pengawa mutar diadu belama enggau besai empas.
Ku iya, timbal diterima nyengkaum maya musin hari besai mandangka sistem bekal ai patut diadu tegap agi enggau tetangkup peminta.
Kelimpah ari nya, iya madah ke perintah mutar penanggul bah betandu nengah chara ti berurun agi, nyengkaum perambu ngerawang sungai dikena mutar penanggul ambuh ti ngasuh ai lubah anyut.
Ku iya, pengawa baka ngaga pegung ngandang ai enggau stesyen pam ulih mantu timpuh pandak, seraya pemutar timpuh panjai begunaka pengawa ngemanah semua sistem parit besai.
“Pemutar kebendar begunaka pengawa ti dipejalai belama nyengkaum ngintu struktur sungai ngambi penanggul bah ulih diputar ngasi agi enggau ungkup timpuh panjai,” terang iya.
Iya mega madah, semua inisiatif nya mandangka perintah ransing nentuka pengelantang rayat terus tejamin, kelimpah ngangkatka tikas idup peranak mega.-EDISI UKAS
