KUCHING: Sarawak deka ngepun program nisih digital nembiak mit ngena teknologi 'artificial intelligence' (AI) ke digaga nengah kerejasama enggau kompeni Jepun, ToyEight.

Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, program nya keterubah iya digaga di Malaysia tauka nyangka bela keterubah bisi di rantau tu.

"Ngarap ke Sarawak nyadi menua keterubah bejalaika model tu.

"Nitihka dipadah Penengkebang Begulai enggau Tuai Pegawai Eksekutif Begulai Toy Eight, Shun Matsuzaka, sepengudah projek pemun sebedau tu, program kerejasama enggau SeDidik nyangka tembu lalu ulih berengkah dipejalaika ari bulan Jun 2027," pia ku iya.

Iya nerangka pekara nya ba aum media sepengudah nemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi ditu, Hari Tiga.

Hari Dua tu tadi, siti Sempekat Semaya (MoA) udah ditanggam SeDidik Sdn Bhd enggau ToyBox Creations and Technologies Sdn Bhd (ToyEight Holdings Inc.) dikena bejalaika program nisih enggau intervensyen ngena teknologi AI.

Dato Sri Fatimah madah, pansik bekaul deka dipejalaika sepengudah program kerejasama nya diatur nengah asil projek pemun sebedau tu ti mandangka asil positif.

Ku iya, model nya bela ulih dikena ukai semina di Sarawak aja tang tau dipejalaika di menua bukai nyengkaum Jepun empu.

"Sebedau tu kitai belalauka Jepun tang diatu Jepun mega tau meda nama ke digaga kitai di Sarawak," ku iya madah baru.-EDISI UKAS

Pemberita: Ahmad Daniel Faiz
Gambar: Hazrin Sunaini