KUCHING: Jepun meruan majak ke pengawa meranak puku di Sarawak lebih agi ba sektor baka pelajar inklusif, ekonomi gadung enggau pemansang modal mensia.
Pekara nya dipadah Duta Jepun Ke Malaysia Shikata Noriyuki maya ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi ditu, Hari Tiga.
Ku iya, Sarawak diatu nyadi menua ke engkeman alai meranakka puku nyengkaum ba sektor kuasa ulih dikena baru baka hidro enggau biomas.
"Pengawa nemuai basa sehari tu besai amat reti lalu aku pechaya Premier Sarawak ngelaluka komuniti dagang Jepun datai meranakka puku di Sarawak alai tu bela deka ngenegapka agi kaul Jepun enggau Sarawak," ku iya madah ba aum media sepengudah penemuai basa nya.
Shikata madah, pemeranak puku Jepun bela disadang deka lebih agi ba pemansang modal mensia nengah latih industri, sukung ngagai institusyen pelajar tinggi enggau ngena teknologi baru ba pelajar.
Kelimpah ari nya, ku iya, chara baru ba pelajar tumu nembiak mit bela diperatika nyengkaum bekenaka teknologi enggau main video maya belajar.
Iya madah, chara ngena ToyEight ba Nintendo dipeda tau nyaup intervensyen penanggul belajar tumu nembiak kelimpah bela tau ngadaka rebak dudi ti lebih agi nyikap diri napi peminta enggau guna industri baru.
"Nya alai, kami andal bisi kerejasama ke tegap agi ba pengawa meranakka puku ti ulih nempa rebak baru di Sarawak," pia ku iya.
Hari Dua tu tadi, siti Sempekat Semaya (MoA) udah ditanggam SeDidik Sdn Bhd enggau ToyBox Creations and Technologies Sdn Bhd (ToyEight Holdings Inc.) dikena bejalaika program nisih enggau intervensyen ngena teknologi 'artificial intelligence' (AI).
Tuju inisiatif nya dikena nambah akses nisih tumu nembiak pra sekula lebih agi nembiak ke empai ngambi servis intervensyen tumu ba One Stop Early Intervention Centre (OSEIC).
Bela datai maya nya Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sapit Menteri Pemansang Indu, Nembiak Mit enggau Pengelantang Komuniti Sarawak Datuk Rosey Yunus, Direktor Opis Kandang Menua Sarawak, Opis Menteri Luar Malaysia Dato Fenny Nuli sereta pemesai ke bukai. -EDISI UKAS
Pemberita: Ahmad Daniel Faiz
Gambar: Hazrin Sunaini
