KUCHING: Program Sarawakku Sayang (SKS) nyadi chara ke engkeman dikena ngemuntangka agi pengawa ngenataika penerang perintah lalu nyeliah rayat saru penemu bekaul inisiatif ke digaga perintah nengeri.

Menteri Pengangkut Sarawak Dato Sri Lee Kim Shin madah, pengawa betemu terus enggau rayat nengah program nya deka nyaup mensia mayuh bulih penerang ke amat ari agensi bekaul.

Ku iya, chara tu dipeda bela tau nyadi pelasar ngedutka agi kaul enggau perintah ke ulih nyaup ngemujur pemansang nengeri.

"Dikena kitai nemu agi nama penerang ke amat, tu mih peluang ke manah...anang kelalu bepanggai ba media rama laban penerang dia bisi enda entu betul," ku iya maya Program Juh Randau ke diatur Unit Komunikasi Awam Sarawak (UKAS) di Studio UKAS, Bangunan Baitulmakmur ditu, Hari Dua.

Iya mega madah, rayat ke nyemetak nemu nyadi pekara ke besai reti dikena nentu tiap bengkah inisiatif perintah ulih dipejalaika enggau efektif agi.

Bekaul SKS, iya ti mega Kaban Kunsil Nengeri (ADUN) Senadin madah, program nya nyadi pelasar ngempung mayuh penerang beguna bekaul polisi enggau inisiatif perintah ke patut ditemu rayat.

"Nengah program tu, perintah mai mayuh penerang ke patut ditemu genap iku rayat," ku iya madah baru.

Nangkan nya, Chairman Komiti Pengatur SKS Sitak Miri Galong Luang madah, tuju program nya dikena ngemanahka agi chara bekunsika servis perintah ngagai rayat.

"Tu peluang rayat meda sereta silik agi nemu nama reti enggau tuju inisiatif perintah," ku iya ke mega Residen Sitak Miri.

Program SKS di Miri deka belabuh ari 24 ngagai 26 April tu ti deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg. -EDISI UKAS