KUCHING: Sarawak ngarap Lumba Malaysia (SUKMA) ulih diatur baka ti diperambu laban pengawa besikap udah dipejalai kenyau ari pun nyengkaum komitmen belanja ti besai sereta jasa bala atlit.
Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, bemacham pengawa besikap udah dipejalai nyengkaum ari sukut logistik, endur diau enggau latih atlit ti udah dipejalai ari pun.
Iya madah, sekeda ari atlit Sarawak mega udah dianjung belatih ba menua tu empu enggau menua luar dikena napi lumba besai nya.
“Lebuh pengawa ngaul Sarawak, aku andal SUKMA patut ditampung.
“Kebuah pia laban mayuh belanja udah dikena ungkup besikap nyengkaum ari sukut logistik, palan diau enggau bayar chengkeram.
“Atlit mega udah dianjung belatih nyengkaum di menua luar.
“Enti lumba tu dilanjar, sekeda ari sida engka enda ulih agi ngambi bagi lumba tu ila berindik ari tatak umur SUKMA semina 21 taun,” ku iya rambau aum pemberita ditu, Hari Empat.
Dato Sri Abdul Karim madah baru, sebarang pemutus sekali ke SUKMA ditampung tauka dilanjar, pekara tu bepanggai ba Opis Menteri Nembiak enggau Lumba Malaysia sereta nengeri Selangor ti nyadi pengatur lumba tu.
Ba lansa sebaka, iya madah, penemuai Menteri Nembiak enggau Lumba Malaysia, Dr Mohammed Taufiq Johar ke Sarawak deka matau sekeda fasiliti lumba nyengkaum Stadium Sarawak enggau Stadium Perpaduan Petra Jaya kelimpah ngundang rayat ba Kampung Semeba.
