KUCHING: Tuai Komuniti enggau Tuai Raban Bansa (KMKK) dipinta mereti ke pekara menua enggau nengeri nyengkaum Konstitusyen Perintah Besai, Sempekat Malaysia 1963 (MA63), Rukun Negara sereta polisi perintah nentuka penerang ti betul ulih diterang ngagai rayat.
Sapit Premier Sarawak, Datuk Amar Prof Dr Sim Kui Hian madah, pemereti ati nya beguna endar laban raban nya nyadi jematan penerang ngagai komuniti menua.
Ku iya, maya diatu sekeda komuniti rindu agi ngerembaika pekara enda menuku dibanding pengawa enggau polisi manah ti dipejalaika perintah.
“Pekara tu beguna endar laban maya diatu kitai napi sekeda ulah ti enda menuku.
“Nama kebuah disebut baka nya laban taja polisi nya manah, tang agi bisi raban ti nyebut utai tunsang.
"Enti pekara nya negatif, nya ti dikerembai," ku iya ba mua mayuh lebuh Pengawa Nutup Seminar Kenegaraan Malaysia MADANI Kunsil nengeri (DUN) Sarawak di Bangunan DUN Sarawak kena Hari Empat.
Kelimpah ari nya, Datuk Amar Dr Sim madah, pemesai guna DUN mega patut ditemu reti lebih agi ngemendar ke akta enggau undang-undang ti meri pengelebih ngagai Sarawak mega patut ditemu KMKK.
Ku iya, DUN Sarawak ngemendarka sekeda undang-undang baka pupu Chukai Jual Sarawak enggau bejalaika levi karbon.
“Nya kebuah DUN tu beguna endar lalu semua tuai raban bansa endang patut nemu enggau mereti ke semua pekara tu,” ku iya.
Sama datai, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali sereta pemesai bukai. -EDISI UKAS
