The Friendship Diplomacy 21–23 Mei di BCCK, Pelasar Industri Negut Kaul Serantau
KUCHING: The Friendship Diplomacy deka diatur kena 21 nyentuk 23 Mei tu di Palan Konvensyen Borneo Kuching (BCCK) nyadi pelasar strategik ti ngempung mayuh industri nyengkaum seni, teknologi, muzik, kraf enggau dagang.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pengawa ngatur program nya ukai semina festival aja tang nyadi pelasar beguna ungkup pemekuh industri lokal enggau antarabansa mandang penau sida.
Iya madah, pengawa bala pemekuh industri ari Indonesia enggau Singapore ngambi bagi ba program nya ngerandang peluang kerejasama meraka adan sereta negap rentayan industri kreatif renggat serantau.
“Tu ukai semina pasal festival tang siti pelasar ungkup mayuh industri mandang pengulih sida, ukai semina ngaul pemekuh industri lokal aja tang pemekuh besai ari Indonesia enggau Singapura,” ku iya ba aum media ditu, Hari Empat.
Program nya nyelinting bala pemeranak puku antarabansa, pemeli serantau enggau profesional kreatif ti deka meri empas besai ngagai sektor dagang temuai seriris enggau selimping lima juta temuai ke Sarawak.
Pia mega, nya disadang negap dagang mit enggau jelan pemesai (PKS) sereta bala artis lokal kelimpah negap kaul diplomatik nengah ekonomi kreatif meraka adan menua.
Bela datai, Sapit Menteri Dagang Temuai, Industri Kreatif enggau Seni Pemerindang Sarawak, Snowdan Lawan, Sekretari Mendam opis menteri nya, Morshidi Frederick sereta Direktor The Friendship Diplomacy, Andy Eric Manuhutu. – EDISI UKAS
