SERIAN: Opis Menteri Pelajar, Inovasyen enggau Pemansang Penau (MEITD) Sarawak ngemeratka pemesai guna pemansang modal mensia nyadi pugu pemujur agenda opis menyeri ari bejalaika Program Industry Continuous Professional Development (iCPD).

Menteri MEITD Dato Sri Roland Sagah Wee Inn madah, tuju program iCPD ti dipejalaika MEITD nyempil takah entara peminta industri enggau pengelandik pengereja lokal, sereta nyukung ekonomi tumbuh tegap enggau meruan.

Ku iya, latih bekaul pengelikun enggau pengerai pengereja (OSH) ba program nya mega ngayanka perintah keran nentuka rampa kereja ti likun.

Iya nyebut pekara nya lebuh bejadi nutup program nya di Dewan Panggah, Palan Opis Bagi Menua Serian, Hari Empat.

Iya nerang baru, latih Koordinator OSH diatu diterit di baruh Akta Keselamatan dan Kesihatan Pekerjaan (Pindaan) 2022, ke alai pengaji ti bisi lima pengereja tauka lebih enda tau enda nyiri siku orang ti bisi latih ngatur pekara pengelikun ba endur gawa.

Program iCPD siri latih Koordinator OSH nya berengkah di Bintulu lalu udah dikerembai ke selampur Sarawak, dipejalai di Serian enggau Siburan kelai siri ke-10 program nya.

Inisiatif nya mega ngayanka kerejasama entara opis menteri bukai baka Opis Menteri Dagang Antarabansa, Industri enggau Meranak Puku (MINTRED) sereta Opis Menteri Pemansang Indu, Nembiak Mit enggau Pengelantang Komuniti (KPWKM).

Ku Dato Sri Roland Sagah, program iCPD beguna endar dikena nambah penau pengereja nengah pengawa belajar, seriris enggau juluk Strategi Pemansang Pengudah COVID-19 (PCDS) 2030 ungkup nempa 500,000 pengereja landik manggai 2030.

Sepenyampau 21 penyereta mujur nembuka latih enggau nerima setipikit ti diaku ba renggat nasional, lalu nya nambah pengelaku sida ba makit kereja enggau profesionalisme.

Sama datai, Sapit Menteri Pelajar, Inovasyen enggau Pemansang Penau Datuk Francis Harden Hollis, Sekretari Mendam MEITD Datu Adana Jed, Residen Bagi Menua Serian Caroline Cleophas Joseph sereta sekeda tuai opis enggau tuai raban bansa menua nya.-EDISI UKAS