SINGAPURA: Sarawak Pavilion matak perati mensia mayuh maya Food & Hospitality Asia (FHA) 2026 ti mantai pengelain enggau penyelai sereta inovasyen produk menua tu ti jauh bebida enggau sida bukai ke bela ngambi bagi ba program nya.
Diatur Opis Dagang Enggau Dagang Temuai Sarawak Di Singapura (STATOS), Sarawak Pavilion bisi 19 penyereta nyengkaum sida ke baru ti bela mandangka ubah manah ba sektor dagang mit enggau jelan besai (PKS) Sarawak.
Sekeda ari produk ke dipandang maya nya baka lada Sarawak, sarang burung, ikan empurau enggau nanas sarawak gold 1 (SG1).
Ba pekara bekaul, Sapit Premier Sarawak Datuk Amar Awang Tengah Ali Hasan madah, platform baka FHA meri awak ngagai orang dagang menua tu ngerembaika agi dagang enggau produk sida ba renggat antarabansa.
Ku iya, inovasyen baka teh ke digaga ngena kemiding ngelai pengulih orang dagang menua tu landik ngepun penatai pemisi baru.
"Tu mandangka produk kitai bisi pengelebih iya empu lalu nerima sambut ke manah nyengkaum ba makit dagang di Singapura," ku iya.
Iya nerangka pekara nya maya dirandau ukas sepengudah bejadika Sarawak Pavilion ditu, Hari Dua.
Iya ke mega Menteri Dagang Antarabansa, Industri Enggau Pemeranak Puku Sarawak (MINTRED) madah, pengelebih Sarawak ba sektor betanam betupi enggau berikan nyadi pengelebih ke dikembuan orang dagang menua tu besemekih ba dagang global.
"Orang diatu lebih agi ngemeratka kualiti enggau pengelikun produk.
"Tu begunaka orang dagang landik ngadu produk ngambika ulih tetitihka peminta," ku iya madah baru.
FHA 2026 ke diatur ari 21 ngagai 24 April di SIngapore Expo, disadang matak penatai lebih 80,000 iku mensia mayuh ari selampur dunya.
Bela datai maya nya Sapit Menteri Dagang Antarabansa, Industri enggau Pemeranak Puku Sarawak Datuk Dr. Malcom Mussen Lamoh, Chairman STATOS Tan Sri Datuk Amar Mohamad Morshidi Abdul Ghani, Penyanding Penemu MINTRED Dato Sri Mohd Naroden Majais, Kaban Komiti Direktor STATOS Datu Hii Chang Kee ke mega Sekretari Perintah Sarawak (Operasyen), Datu Laura Lee Ngien Hion, Dato Ngui Ing Ing, Datu Lester Matthew enggau Charlie Soh Poh Peng sereta Tuai Pegawai Eksekutif STATOS, Chew Chang Guan.-EDISI UKAS
