KUCHING: Gawai Dayak Bazaar enggau Ethnocultural Festival 2026 di Miri deka nyadi pelasar ke besai reti ba pengeransing ngetan sereta nyaga pesaka daya idup ti digulu mayuh penyereta nyengkaum rebak baru.

Sapit Chairman II, Penghulu Wilfred Mac madah, pengerami ke diatur berengkah 1 ngagai 23 Mei nya meri awak ngagai mensia mayuh nambah penemu bekaul adat pesaka macham etnik.

"Tu awak ke diberi kitai ngagai rebak baru ngambika sama bela nampung main lama enggau pesaka asal kitai, ngambika semampai ulih ditan nyentuk ila," ku iya maya dirandau ba Studio UKAS sepengudah Program Juh Randau ditu, Hari Dua tu tadi.

Iya mega madah, pengerami nya ila deka disempulang enggau mayuh main lama sereta pekit nyengkaum pekit Ngajat, Betabuh, Sape, Kuntau, Gendang Pampat, Dayung Sangon, Keling Belawan, Keligit Orang Ulu enggau Kumang Iban.

Maya nya mega, Sekretari pengerami, Kanselor Martin Dinil madah, pengerami nya endang dibuka ngagai semua penyereta ari selampur nengeri.

"Program ke diatur ukai semina ungkup Miri aja tang semua rayat ari selampur Sarawak," pia ku iya.

Iya madah, penyereta ke datai ari tiap sitak menua ba Sarawak ngambi bagi ba pekit ke diatur disadang ngerichahka agi pengerami nya ila.

Kelimpah ari nya, Tukang Wang pengerami, Dr Mary Calang madah, sukung ari Perintah Sarawak besai reti dikena ngemujurka agi pengerami main asal betikas besai nya.

Ku iya, pengawa tu bela seriris enggau pengeransing nyaga enggau ngetan identiti budaya nengeri ngambika enda punas.

Pengerami ke diatur lebih tiga minggu nya bela disempulang enggau program pemerindang begulai enggau artis, program komuniti enggau program interaktif ke diatur ninting lemai. -EDISI UKAS