PAKAN: Perambu pemansang enda ulih naka keretas aja, tang patut digaga enggau dipenyadi ngambi penguntung datai ba rayat.
Kaban Kunsil Nengeri (ADUN) Pakan, Tan Sri William Mawan Ikom madah, tetiap pelin pemansang meseti dipenyadi ari pengawa ti nyata, berurun enggau meruan ngambi asil nyata dipeda rayat.
“Pemansang ukai baka batu ditikau ke tasik, semina ngasuh ai belingang tang udah nya tengelam.
“Tang pemansang patut nipakka jaku ngambi meri empas timpuh panjai ngagai peragam penemu, timbal enggau kaul rayat,” ku iya.
Iya nibar ke jaku nya ngagai media pengudah ngulu Pengerami Bejadi Program Negap Tuai Raban Bansa enggau Tuai Komuniti (KMKK) Pelilih Pakan di Balai Komuniti Pakan, Hari Tiga.
Tan Sri William Mawan mantangka jaku, perintah mega patut nentuka tetiap projek ulih dipun ngambi rayat andal ke jaku sida.
Ku iya, perengkaguna pemun baka jalai alun, bekal kuasa karan enggau ai ba menua nya udah bisi, tang pengawa ngemanah ari sukut ngaduka baru enggau nyeraris entara agensi agi diguna.
Iya mega madah, Pakan patut majak mansang nyadi siti pelilih ti sikar bejalaika pemansang lalu ukai semina bepanggai ba perambu aja.-EDISI UKAS
