Anak Sarawak Wong Su Chung Nurai Sejarah, Umur Ukai Penekul, Nerima Malaysia Book of Records Ba Mua Premier Sarawak
KUCHING: Pengeliat ati enggau pengandal nyadi lalau ti meransang anak Sarawak, Wong Su Chung, napi bemacham penguji besai dunya nyentuk ulih nurai sejarah kediri ba panggau antarabansa.
Ba umur 60 taun, iya ukai semina mujur datai ba tuchung pemadu tinggi dunya Gunung Everest, tang nurai siti da penyulut lebuh nembuka pejalai Ekspedisyen Dwi Antartika enggau niki Gunung Vinson sereta ekspedisyen ski penyauh 111 kilometer (km) ke darjah kepenudi Kutub Selatan.
Pemujur nya ngangkatka iya nyadi rayat Sarawak keterubah ulih datai ba tuchung Gunung Everest bulan Mei 2024, kelimpah rayat Malaysia keterubah nembuka Antarctica Dual Expedition ti mega dirikod ba The Malaysian Book of Records.
Sejarah besai nya dikemata Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi ba siti penemuai basa ditu, Hari Empat.
Pengawa nya mega digulu Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew.
Wong madah, tetiap pejalai iya niki bukit enggau ekspedisyen nya ukai trofi dikemegah, tang siti pengawa ti nguji pengeliat, disiplin enggau pengepuh mensia.
Iya madah, jaku lalau ba pengidup seruran dipegai teguh iya nya lantang ati napi penanggul, kelimpah ngena runding ti rasional, nelebaka diri enggau neruska singkang ke mua.
“Sekumbang bejalai, aku seruran mujur napi penguji. Datai ba tuchung Gunung Everest ukai ketegal aku kering, tang laban aku ngasi ke ajar Tuhan. Singkang diatur, taja mayuh penekul, aku ulih nembuka pejalai tu lalu pulai ke menua nadai apa nama,” ku iya.
Ba pemujur nya, pejalai idup Wong ukai muntang. Taun 2020 penguji besai nuntung lebuh kompeni ti ditumhuh lebih 20 taun tusah ketegal pandemik.
Ba maya nya mega, iya balat bakal nyentuk satu pertiga meniskus kiba dibuai, lalu nya ngasuh iya badu agi ngining belanda ti sebedau tu dikemeran ba pengidup.
Ari semangat baru nya, Wong ngalih ngagai dunya niki bukit berengkah 2022 nyentuk 2023 ba sekeda pejalai besai nyengkaum Gunung Kilimanjaro, Aconcagua enggau Manaslu dikena nguji pengetan runding enggau batang tubuh.
Ku iya, pengarap ukai mutar penanggul, tang meri pengering napi semua penguji enggau liat ati.
Iya mega ngarap ke kisah pejalai nya ulih meri peransang ngagai rebak biak enda mudah mantul ati taja napi pemar ba pengidup.
Ba Wong, reti pengidup ukai semina dibanding enggau pemujur orang bukai, tang pengawa ngemansangka diri.
“Pengudah ngasai semua penguji, aku nemu tu siti pejalai ari berekat Tuhan. Ba penguji besai tu, aku suah ngasai Tuhan semampai bisi mantu enggau ngembing aku,” ku iya. -EDISI UKAS
